Mungon Messi, ndeshja nuk zhvillohet fare

Inter Miami ka vendosur të shtyjë ndeshjen kundër Independiente del Valle, e planifikuar të zhvillohej në Puerto Rico, për shkak të lëndimit të Lionel Messit.

Superylli argjentinas ka pësuar një tërheqje muskulore në këmbën e majtë gjatë ndeshjes së fundit në Ekuador dhe nuk do të jetë i gatshëm për sfidën e radhës. Duke marrë parasysh situatën, klubi amerikan ka njoftuar në faqen zyrtare se përballja ndaj Del Valle do të zhvillohet më 26 shkurt, në orën 13:00, në stadiumin “Estadio Juan Ramón Loubriel” në Bayamón.

Inter Miami, në bashkëpunim me qeverinë e Puerto Ricos, theksoi se zhvendosja e ndeshjes në një datë tjetër do t’u ofrojë tifozëve përvojën më të mirë të mundshme, duke u dhënë mundësinë ta shohin nga afër tetë herë fituesin e “Topit të Artë”.

“Fatkeqësisht, kam pësuar një lëndim muskulor në ndeshjen e fundit. Mezi kemi pritur t’i takojmë tifozët dhe po punojmë për të gjetur një datë të përshtatshme”, ka deklaruar Messi. “E dimë entuziazmin dhe dëshirën tuaj për të parë një ndeshje të Inter Miami dhe do të jetë shumë e veçantë ta realizojmë këtë së shpejti.”

Ndërkohë, Klinika Ndërkombëtare Rinore e Fondacionit të Inter Miami do të zhvillohet sipas planit. Trajnerët e Akademisë së klubit kanë mbërritur tashmë në Puerto Rico dhe do t’u ofrojnë 40 fëmijëve në nevojë një përvojë të veçantë sportive.

Po ashtu, stërvitjet e planifikuara për nesër janë shtyrë për datën 25 shkurt.