Interi favorit

Edhe sonte vëmendja e futbollit evropian do të jetë tek ndeshjet e "play-off"-it të UEFA Champions League.

Janë katër përballje mjaft interesante që premtojnë emocione.

Kësaj ndeshje i paraprinë edhe emisioni me mysafirë në studio.

Bodø/Glimt vjen në këtë fazë pasi tronditi Evropën në fazën e ligës, duke mposhtur emra si Manchester City (3-1) dhe Atletico Madrid (2-1). Ndonëse kampionati norvegjez ka përfunduar, skuadra e Kjetil Knutsen ka treguar se mund të përballet me këdo në fushën e saj me bar artificial. Në anën tjetër "nerazzurrët" udhëtojnë drejt Norvegjisë si favoritë, të udhëhequr nga një formë e shkëlqyer në Serie A.

Edhe pse dështuan të kualifikoheshin direkt në top-8 (përfunduan në vendin e 10-të), përvoja e tyre në dy finalet e fundit të Champions League i bën ata një kundërshtar të frikshëm. Trajneri i Bodø/Glimt, Knutsen ka theksuar se skuadra e tij është mësuar të luajë në kushte ekstreme (deri në -10°C), diçka që mund të jetë një pengesë për ekipin italian.

Përveç sfidës në Norvegji, sot luhen edhe tri takime të tjera jetike për fatet e sezonit evropian:

Nga ora 18:45 luhet Qarabağ – Newcastle. Skuadra angleze shihet si favorite, por Qarabağ ka treguar rezistencë të lartë në shtëpi. Olympiacos – Bayern Leverkusen (21:00), është ndeshje po ashtu interesante.

Gjermanët vijnë pa portierin e tyre të parë, Mark Flekken, ndërsa Olympiacos po përjeton një nga sezonet më të mira evropiane në dekadën e fundit. Ndërkaq, në ndeshjen Brugge – Atletico Madrid (21:00) pritet të jetë ndeshje e hapur, ku statistikat sugjerojnë se të dyja skuadrat kanë gjasa të shënojnë.