Senzacion në Angli

Premier League po përjeton një zhvillim befasues, teksa Manchester United po përgatit një lëvizje që mund të hyjë në histori. Klubi nga “Old Trafford” është i kënaqur me ndikimin e trajnerit Michael Carrick, i cili mori drejtimin e skuadrës pas largimit të Amorim dhe ka ruajtur ekipin të pamposhtur, me katër fitore dhe një barazim në ndeshjet e fundit.

Forma pozitive ka bindur drejtuesit që të planifikojnë seriozisht sezonin e ardhshëm, duke menduar për përforcime të mëdha në merkato.

 Sipas raportimeve të Daily Mirror, objektivi kryesor është mesfushori i Liverpool-it, Alexis Mac Allister. Mesfushori argjentinas shihet si pasuesi ideal i Casemiros, i cili pritet të largohet në fund të sezonit.

Megjithatë, operacioni konsiderohet shumë i vështirë. Mac Allister ka kontratë afatgjatë deri në vitin 2028 dhe Liverpool-i investoi rreth 60 milionë euro për transferimin e tij në vitin 2023.

Rivaliteti i fortë mes dy klubeve historike e bën marrëveshjen edhe më të ndërlikuar. Për të bindur rivalët, United mund të përfshijë në negociata lojtarë si Mainoo, Ugarte ose Mount.

Nëse ky transferim realizohet, ai do të shënonte kalimin e parë të drejtpërdrejtë mes dy gjigantëve anglezë që nga lëvizja e Phil Chisnall në vitin 1964, duke i dhënë fund një pritjeje 62-vjeçare.