Juventus raporton humbje 2.5 milionë euro në gjysmën e parë të vitit fiskal

Juventus ka raportuar një humbje neto prej 2.5 milionë eurosh në gjysmën e parë të vitit fiskal, në krahasim me fitimin prej 16.9 milionë eurosh të regjistruar në të njëjtën periudhë të vitit të kaluar.

Sipas njoftimit të klubit italian, të publikuar të hënën, rezultati neto dhe fluksi operativ i parasë pritet të jenë negativë për gjithë vitin fiskal që përfundon më 30 qershor 2026. Viti fiskal i Juventusit shtrihet nga 1 korriku deri më 30 qershor.

Të ardhurat e klubit nga Torino ranë për rreth 11 për qind, duke arritur në 260.6 milionë euro për periudhën korrik–dhjetor, kryesisht si pasojë e rënies së të ardhurave nga transmetimet televizive dhe shitja e biletave, si dhe të ardhurave më të ulëta nga regjistrimi i lojtarëve. Këto rënie u kompensuan vetëm pjesërisht nga rritja e të ardhurave nga sponsorët.

Juventus, i cili dominoi futbollin italian për gati një dekadë deri në vitin 2020, u godit më pas nga një skandal kontabël i lidhur me transferimet e lojtarëve dhe pagesat e pagave, çka rezultoi me përjashtimin nga garat evropiane në sezonin 2023/24.

Ndërkohë, në muajin tetor, klubi emëroi ish-përzgjedhësin e Italisë, Luciano Spalletti, si trajner kryesor deri në fund të sezonit.