Federata Argjentinase e futbollit në hetim

Futbolli argjentinas ndalon për një javë pas një hetimi që përfshin AFA-n dhe presidentin e saj, Claudio Tapia. Liga dhe presidentët e klubeve kërkuan pezullimin e javës së nëntë të kampionatit, planifikuar nga 5 deri më 8 mars, si formë proteste ndaj denoncimit për mashtrim fiskal. Ky vendim u konfirmua nga Liga pas një mbledhjeje të Komitetit Ekzekutiv.

Agjencia qeveritare argjentinase përgjegjëse për mbledhjen e taksave dhe administrimin e ligjeve fiskale (ARCA), po heton nëse AFA ka mbajtur në mënyrë të paligjshme kontributet e lojtarëve dhe punonjësve dhe nuk ka paguar taksat midis marsit 2024 dhe shtatorit 2025, për një shumë rreth 19 miliardë pesos (rreth 11,7 milionë euro). AFA ka mohuar të ketë borxhe fiskale dhe e ka quajtur denoncimin si të pabazuar.

Presidenti Tapia ishte ndaluar për të lëvizur jashtë vendit, por ndalimi u hoq kohët e fundit, duke i lejuar që të marrë pjesë në “Finalissima”-n, më 27, ku Argjentina do të përballet me Spanjën. Përveç çështjes fiskale, AFA është hetuar edhe për pastrim parash, çka shkaktoi kontrolle në dhomat e saj në dhjetor, së bashku me disa klube të Superligës si Racing, Independiente dhe San Lorenzo.

Raporti midis Tapia-s, figurë kyçe e futbollit argjentinas që drejton federatën që nga 2017, dhe qeverisë së presidentit Javier Milei, është i tensionuar prej kohësh. Tapia kundërshton transformimin e klubeve tradicionale në shoqëri sportive me përgjegjësi të kufizuar për investime të huaja, një model i mbështetur nga Milei.

Silvana Giudici nga partia në pushtet theksoi se “nuk ka asnjë persekutim politik” dhe shprehu shpresën që klubet të mos mbeten peng i AFA-s.