Zelensky bisedë telefonike me Trump përpara takimit në Gjenevë, çfarë diskutuan dy udhëheqësit?

Presidenti ukrainas Volodymyr Zelensky zhvilloi një bisedë telefonike me Presidentin e SHBA-së Donald Trump, siç njoftoi ai në një postim.

Sipas tij, në bisedë morën pjesë edhe Steve Witkoff dhe Jared Kushner. Zelensky tha se ekipet nga të dyja palët po “punojnë intensivisht “dhe i falenderoi ata për përpjekjet dhe pjesëmarrjen e tyre në negociatat që synojnë përfundimin e luftës.

Ai i bëri një referencë të veçantë programit PURL, duke vënë në dukje se “kjo është periudha më e vështirë e dimrit për Ukrainën”, por se raketat për sistemet e mbrojtjes ajrore, të cilat Ukraina mund t’i sigurojë nga SHBA-të, kontribuojnë në mënyrë vendimtare në adresimin e sfidave dhe mbrojtjen e jetëve.

Të dy udhëheqësit diskutuan çështjet që do të ngrihen në takimin dypalësh të nesërm në Gjenevë, si dhe përgatitjen e takimit të ardhshëm të ekipeve negociuese në përbërje të plotë dhe në format trepalësh, në fillim të marsit.

Zelensky shprehu pritjen se ky proces do të lejojë kalimin në negociata në nivel udhëheqësish, duke vënë në dukje se Presidenti Trump mbështet këtë sekuencë hapash.

“Vetëm në këtë mënyrë mund të zgjidhen të gjitha çështjet komplekse dhe të ndjeshme dhe lufta të marrë fund më në fund”, tha ai, duke e mbyllur me falenderime.