Kielini mbron Spaletin, çfarë fshihet pas heshtjes së trajnerit

Heshtja e Spaletit në fund të ndeshjes Juventus-Gallatasaraji vlejti më shumë se një mijë fjalë. Trajneri bardhezi nuk doli para mediave pas mbrëmjes në “stadium”, ndonëse gjatë lojës ishte shumë aktiv, si me lojtarët e tij, ashtu edhe me arbitrimin, sidomos në momentet kur turqit tentonin të thyenin ritmin e lojës me ndërprerje të vazhdueshme.

Ish-trajneri i Italisë madje u dëgjua të thoshte “ikim fare” në fund të pjesës së parë, ndërsa zyrtari i katërt garantonte një shtesë të konsiderueshme për humbjet e kohës. Në fakt u luajtën 5 minuta shtesë në fraksionin e parë dhe 2 në të dytin. Por ajo që bëri më shumë zhurmë ishte pikërisht mungesa e fjalëve pas vërshëllimës finale: as analizë, as polemikë. Vetëm zhgënjim i madh. Sipas atyre që e takuan në dhomat e zhveshjes, Spaleti ishte thellësisht i tronditur nga mënyra si përfundoi sfida.

ZGJEDHJE ME KLUBIN – Vendimi për të mos marrë pjesë në aktivitetet mediatike pas ndeshjes u mor në marrëveshje me klubin. Pyetjeve të gazetarëve iu përgjigj një nga figurat kryesore të drejtimit, Xhorxho Kielini, sot përgjegjës për strategjitë e klubit. Ish-kapiteni bardhezi e përforcoi pozicionin e trajnerit, duke theksuar se që nga ardhja e tij “Juve nuk ka gabuar pothuajse asgjë, përveç një ndeshjeje dhe 30 minutash”. Sipas Kielinit, eliminimi dhemb sepse Juventusi duhet të jetë gjithmonë në 1/8-at e Champions League, por skuadra ndodhet ende në një proces ndërtimi.

Mbi të gjitha, ai “blindoi” Spaletin në pankinë. “Nuk ka asnjë dyshim për të ardhmen e Luçianos. Tani, fatkeqësisht, do të kemi disa javë të lira më shumë për t’u ulur, për të ndarë planet e së ardhmes dhe për t’i formalizuar në kohën e duhur. Ai ka qenë gjithmonë prioritet, kurrë dyshim”, tha ai.

OBJEKTIVI MINIMAL – Megjithatë, realiteti është i qartë. Kur mori drejtimin e Juventusit, Spaleti kishte pranuar sfidën për të arritur objektivat minimalë sezonalë. Pas eliminimit nga Kupa e Italisë, edhe dalja nga Champions erdhi më herët nga sa pritej. Në këtë pikë, sezoni mund të shpëtohet vetëm me vendin e katërt në Serie A, që garanton rikthimin në Champions League sezonin e ardhshëm.

Çdo gjë tjetër do ta linte Juventusin me një bilanc të hidhur, pavarësisht sinjaleve pozitive në lojë dhe mbështetjes së plotë të drejtuesve ndaj trajnerit. Heshtja e Spaletit, në fund, ishte fotografia më e qartë e një mbrëmjeje që la shije krenarie për paraqitjen, por edhe zhgënjimi të thellë për rezultatin.