Qipro në panik, nis evakuimet në disa zona që rrezikohen nga Irani

Sipas CNN në Greqi, Ministria e Brendshme e Qipros ka njoftuar se Qarku Bashkiak i Akrotirit do të mbetet nën status evakuimi deri të premten, më 6 mars, kur autoritetet do të rishikojnë masën në bazë të vlerësimit të situatës. Vendimi lidhet me zhvillimet në luftën e Iranit.

Ministria bëri të ditur se autoritetet po informojnë në mënyrë proaktive banorët e zonave Timi, Anarita dhe Mandria, si edhe të Ormideias, Xylofagos dhe Xylotympos. Autoritetet vendore, në bashkëpunim me Forcën e Mbrojtjes Civile (CivilDefenceCy), po dërgojnë mesazhe për të njoftuar qytetarët mbi pikat e caktuara për strehim të përkohshëm, në rast se konsiderohet i nevojshëm evakuimi i këtyre zonave.

Autoritetet kontaktuan gjithashtu me udhëheqësin e komunitetit të Pylës për të informuar banorët.

Ekipet e Mbrojtjes Civile vazhdojnë patrullimet në zonën e Akrotirit dhe mbajnë kontakte me banorët që u larguan nga shtëpitë e tyre, me qëllim ofrimin e ndihmës dhe udhëzimeve të nevojshme.