Franca njofton zgjerimin e arsenalit bërthamor, Macron flet për bashkëpunimin me vendet europiane

Emmanuel Macron ka njoftuar se Franca do të rrisë për herë të parë pas dekadash arsenalin e saj bërthamor dhe do të thellojë bashkëpunimin ushtarak me tetë vende evropiane, në kuadër të një forcimi madhor të doktrinës së parandalimit strategjik.

Presidenti francez deklaroi se Parisi mund të dërgojë avionë luftarakë Dassault Rafale, të aftë për mbajtjen e armëve bërthamore, në vende partnere si Gjermania dhe Polonia. Megjithatë, ai theksoi se vendimmarrja për përdorimin e armëve bërthamore do të mbetet ekskluzivisht në duart e presidentit francez, duke ruajtur sovranitetin kombëtar.

Sipas ‘The Guardian’, deklaratat u bënë gjatë një fjalimi në bazën e nëndetëseve bërthamore në Île Longue, në Britani, ku Macron theksoi se Evropa po përballet me një periudhë trazirash gjeopolitike dhe rreziqesh të shumta. Sipas tij, Franca, si e vetmja fuqi bërthamore e Bashkimit Evropian, duhet të forcojë kapacitetet parandaluese përballë kërcënimeve të reja.

Franca aktualisht zotëron rreth 290 koka bërthamore, një numër që nuk ka ndryshuar që nga viti 1992. Ky arsenal renditet i katërti në botë pas Rusisë, SHBA-së dhe Kinës. Macron nuk specifikoi se sa do të rritet numri i kokave bërthamore, por insistoi se vendimi nuk përbën garë armatimi, por masë për ruajtjen e fuqisë shkatërruese parandaluese.

Presidenti francez përmendi luftën e Rusisë në Ukrainë, fuqizimin ushtarak të Kinës dhe ndryshimet në strategjinë mbrojtëse të SHBA-së si arsye pse Evropa duhet të marrë më shumë përgjegjësi për sigurinë e saj.

Sipas planit të ri, asetet strategjike franceze mund të vendosen në vende të tjera evropiane në rrethana të caktuara. Bisedimet për bashkëpunim të zgjeruar tashmë kanë nisur me Mbretërinë e Bashkuar, Gjermaninë, Poloninë, Holandën, Belgjikën, Greqinë, Suedinë dhe Danimarkën. Kancelari gjerman Friedrich Merz konfirmoi se janë zhvilluar bisedime fillestare me Parisin për çështjen bërthamore, ndërsa kryeministri polak Donald Tusk deklaroi se Polonia është në dialog me aleatët evropianë për propozimet franceze.

Nga ana tjetër, kryeministri suedez Ulf Kristersson theksoi se forcimi i kapaciteteve mbrojtëse evropiane nuk ka qenë kaq i rëndësishëm që nga Lufta e Dytë Botërore. Franca dhe Gjermania njoftuan gjithashtu krijimin e një grupi të përbashkët drejtues bërthamor të nivelit të lartë, duke theksuar se iniciativa synon të plotësojë, dhe jo të zëvendësojë, parandalimin bërthamor të NATO-s.

Macron e cilësoi këtë hap si të domosdoshëm për të garantuar që çdo kundërshtar i mundshëm të mos e konsiderojë kurrë një sulm ndaj Francës apo Evropës pa pasoja shkatërruese.