Disfatë turpëruese ndaj Wolves, Slot kërkon reagim urgjent nga lojtarët

Trajneri i Liverpool FC, Arne Slot, ka reaguar me zhgënjim pas humbjes 2-1 ndaj Wolverhampton Wanderers, skuadrës së fundit në tabelë, duke pranuar se ekipi i tij duhet ta zgjidhë problemin e pësimit të golave në minutat e fundit. Disfata në “Molineux” erdhi pasi Rodrigo Gomes kaloi vendasit në epërsi, ndërsa Mohamed Salah barazoi përkohësisht, para se një goditje e devijuar e Andres të mposhtte portierin Alisson Becker në çastet e fundit.

Slot theksoi se skuadra e tij po humb shumë pikë në kohën shtesë, duke nënvizuar se tri nga 22 ndeshjet e fundit janë humbur pikërisht në momentet përfundimtare.

Ai pranoi se, megjithëse Liverpooli krijoi më shumë se kundërshtari, rezultati mbeti i njëjtë – një tjetër humbje 2-1 në një sezon që ai e cilësoi zhgënjyes. Sipas tij, pjesa e parë ishte larg nivelit të kërkuar, ndërsa në të dytën pati më shumë urgjencë, por mbrojtja e pakujdesshme dhe vendimet e gabuara kushtuan sërish.

Kjo humbje e lë Liverpoolin në pozitë të vështirë në garën për një vend në Ligën e Kampionëve dhe rrit presionin mbi trajnerin holandez, i cili sezonin e kaluar u konsiderua si figura kryesore e “Anfield”. Kapiteni Virgil van Dijk pranoi se skuadra ishte e ngadaltë, e parashikueshme dhe e pakujdesshme në posedim, duke theksuar se përgjegjësia bie mbi vetë lojtarët. Liverpooli do të ketë mundësi për reagim të menjëhershëm ndaj Wolves në ndeshjen e raundit të pestë të Kupës FA.