Orban rrit kontrollet kufitare, teksa lufta në Iran godet fushatën zgjedhore në Hungari

Kryeministri i Hungarisë, Viktor Orban, ka urdhëruar kontrolle më të rrepta kufitare për shtetasit e huaj pas sulmeve amerikane dhe izraelite ndaj Iranit, ndërsa ai i konsideron gjithnjë e më shumë çështjet e sigurisë si një shtyllë qendrore të fushatës së tij zgjedhore.

Orban ka argumentuar se konflikti i armatosur në Lindjen e Mesme paraqet rreziqe për Hungarinë për sa i përket çmimeve të energjisë dhe sigurisë kombëtare. Analistët thonë se narrativa e tij se ai është ofruesi i sigurisë mund të jetë e dobishme në prag të votimeve.

Në të njëjtën kohë, Orban ka përshkallëzuar një mosmarrëveshje me Ukrainën mbi tubacionin Druzhba, një arterie kritike për furnizimin me energji të Hungarisë. Tubacioni u godit nga një sulm i dyshuar rus në fund të janarit dhe nuk është riparuar që atëherë.

Hungaria do të shkojë në kutitë e votimit më 12 prill në zgjedhjet parlamentare, në të cilat partia opozitare Tisza është përpara Fidesz të Orban-it. Orban e ka qeverisur Hungarinë me një shumicë absolute parlamentare që nga viti 2010.

Sfiduesi i tij kryesor, Peter Magyar, po zhvillon një fushatë agresive të fokusuar në koston e jetesës dhe inflacionin.

Të shtunën e kaluar, pak pasi SHBA-të dhe Izraeli nisën sulmet e tyre ndaj Iranit, Orban mblodhi kabinetin e tij të sigurisë dhe e rriti alarmin terrorist të vendit me një nivel. Pastaj, të enjten, kryeministri u takua me komitetin e tij koordinues kundër terrorizmit dhe urdhëroi kontrolle kufitare.

“Organizatat terroriste me origjinë nga Lindja e Mesme janë vendosur dhe janë forcuar në Evropën Perëndimore. Ne presim që ato të aktivizojnë qeliza terroriste në të gjithë Evropën. Ne do ta mbrojmë paqen dhe sigurinë e Hungarisë edhe në këtë situatë. Prandaj, kemi forcuar kontrollet mbi trafikun e pasagjerëve të huaj që mbërrijnë në Hungari”, njoftoi Orban.