Arsenali po e bën gati transferimin e lojtarit

Arsenali raportohet se po planifikon transferimin e një fituesi të Ligës së Kampionëve për të forcuar skuadrën para sezonit 2026/27 të Premierligës.

Ndërsa sezoni 2025/26 po hyn në fazën e fundit, ekipi i drejtuar nga Mikel Arteta ende ka shanse teorike të fitojë katër trofe: Premierligën, Ligën e Kampionëve, FA Cup dhe EFL Cup, duke arritur një sukses historik për një klub anglez.

Megjithatë, pavarësisht formës së mirë të Arsenalit këtë sezon, fitimi i të katër trofeve duket pak i mundshëm.

Prioriteti kryesor për “Topçinjtë” është titulli i parë në Premierligë që nga sezoni 2003/04.

Aktualisht, Arsenali kryeson kampionatin anglez me shtatë pikë avantazh ndaj Manchester City, megjithëse ka luajtur një ndeshje më shumë.

Dy skuadrat do të përballen gjithashtu në finalen e EFL Cup më 22 mars.

Pavarësisht fokusit në këtë sezon, drejtuesit e Arsenalit po mendojnë tashmë për afatin kalimtar të verës.

Sipas mediumit spanjoll “Fichajes”, objektivi kryesor është anësori i Paris Saint-Germain dhe kombëtares së Gjeorgjisë, Khvicha Kvaratskhelia.

25-vjeçari iu bashkua PSG-së nga Napoli në janar 2025 dhe ndihmoi klubin francez të fitonte Ligue 1, Coupe de France, Ligën e Kampionëve dhe Trophee des Champions.

Në sezonin e tij të parë ai shënoi tetë gola dhe dha tetë asistime në 32 ndeshje.

Ndërsa këtë sezon ka kontribuar me nëntë gola dhe gjashtë asistime, megjithëse PSG ka pasur një rënie forme së fundmi, duke humbur 3-1 në shtëpi ndaj Monacos.

Arsenali e sheh Kvaratskhelian si një lojtar që mund të lidhet mirë në sulm me Bukayo Saka dhe Viktor Gyokeres, duke sjellë aftësi të forta driblimi dhe cilësi teknike për të thyer mbrojtjet më të forta.

Sipas raportit, ka pasur edhe tensione në dhomën e zhveshjes së Paris Saint-Germain lidhur me vendimmarrjen e tij në fushë dhe numrin e golave.

Anësori, i cili fiton rreth 363 mijë paund në javë, vlerësohet rreth 79 milionë paund dhe ka kontratë me PSG deri në verën e vitit 2029.

Megjithatë, ende nuk është e qartë nëse Khvicha Kvaratskhelia është i interesuar të transferohet tek Arsenali.