Rusia bombardon Ukrainën, sulmet vrasin katër persona në Kievi teksa bisedimet për paqe ngecin

Të paktën katër persona u vranë dhe 15 të tjerë u plagosën në një sulm të kombinuar rus me raketa dhe dronë në rajonin e Kievit gjatë natës, tha të shtunën presidenti ukrainas Volodymyr Zelensky.

Tre nga të plagosurit ishin në gjendje kritike, dy prej të cilëve po i nënshtrohen një ndërhyrjeje kirurgjikale, njoftoi kreu i administratës rajonale Mykola Kalashnyk. Sulmi goditi katër rrethe, duke dëmtuar ndërtesa banimi, institucione arsimore, ndërmarrje dhe infrastrukturë kritike, tha Kalashnyk në një postim në rrjetet sociale, duke shtuar se kishte “informacion se rreth 30 vendeve ishin dëmtuar”.

Zelensky tha se objektivi kryesor për sulmet e natës ishte “infrastruktura energjetike e rajonit të Kievit”. Ai tha se Rusia kishte lëshuar 430 dronë dhe 68 raketa, duke shtuar se mbrojtja ajrore kishte kapur përkatësisht 402 dhe 68 prej tyre.

Zelensky theksoi se operacionet e shpëtimit dhe pastrimit ishin duke u zhvilluar “në rajonet e Kievit, Sumit, Kharkivit, Dnipros dhe Mykolaivit”.

Ministria e Mbrojtjes e Rusisë tha të shtunën se sulmet e natës kishin në shënjestër objektet e energjisë dhe industriale që u shërbejnë forcave të armatosura të Ukrainës, si dhe aeroportet ushtarake.

Sulmet erdhën disa ditë pasi SHBA-të shtynë bisedimet e paqes midis Rusisë dhe Ukrainës të planifikuara për këtë javë, duke përmendur luftën në Lindjen e Mesme.

Rusia tashmë po përfiton nga një rritje e çmimeve globale të energjisë dhe mund të shpresojë që lufta SHBA-Izrael me Iranin do të shkëpusë vëmendjen nga Ukraina dhe do të shterojë arsenalet perëndimore.

Zelensky të shtunën u bëri thirrje partnerëve perëndimorë të Kievit që t’i kushtojnë “vëmendje njëqind për qind” nevojës për të rritur prodhimin e raketave të mbrojtjes ajrore.

“Rusia do të përpiqet të shfrytëzojë luftën në Lindjen e Mesme për të shkaktuar shkatërrime edhe më të mëdha këtu në Evropë, në Ukrainë. Ne duhet të jemi plotësisht të vetëdijshëm për nivelin real të kërcënimit dhe të përgatitemi në përputhje me rrethanat, përkatësisht: në Evropë, ne duhet të zhvillojmë prodhimin e raketave të mbrojtjes ajrore – veçanërisht ato të afta për t’iu kundërvënë kërcënimeve balistike, si dhe të gjitha sistemeve të tjera të nevojshme për të mbrojtur vërtet jetët”, tha ai.

Zelenskyy shprehu gjithashtu shqetësimin se lehtësimi i përkohshëm i sanksioneve të SHBA-së mbi naftën ruse do t’i sillte Moskës të ardhura të reja për të financuar përpjekjet e saj të luftës.