A po e shqetëson Granit Xhaka Zvicrën? Përgjigjeje befasuese e selektorit Yakin

Pas rikuperimit nga lëndimi, futbollisti Granit Xhaka luajti 90 minuta për Sunderlandin. Me kombëtaren, ai mund të ketë një pushim të shkurtër.

‘Nëse pyeten tifozët e Sunderlandit për ndeshjet më të rëndësishme të vitit, përgjigjja është e qartë: dy derbit kundër rivalit të madh Neëcastle United.

Sezoni i skuadrës së sapongjitur në elitë nuk mund të shkonte më mirë.

Pasi Sunderland kishte fituar tashmë përballjen e parë në Premier League kundër Neëcastle pas gati dhjetë vitesh, edhe ndeshja e dytë të dielën përfundoi në favor të klubit të Granit Xhakës”, shkruan media zvicerane “Blick”.

Goli i sulmuesit Brian Brobbey për rezultatin 2:1 në minutën e 90-të jo vetëm që siguroi një fitore në derbi, por gjithashtu nxiti një reagim emocional nga kapiteni në rrjetet sociale.

“Kjo do të thotë gjithçka”, - shkroi Xhaka në Instagram pas ndeshjes. Për kapitenin e kombëtares, kjo ishte ndeshja e dytë radhazi me 90 minuta, pasi kishte munguar në katër ndeshje për shkak të një lëndimi në kyçin e këmbës.

Selektori i kombëtares zvicerane, Murat Yakin, është i kënaqur që Xhaka është rikthyer në fushë.

“Kam shumë komunikim me Granitin.

Nuk jam i shqetësuar; ai e njeh trupin e tij,” tha selektori për lëndimin e liderit të skuadrës.

Yakin beson se Xhaka është një luftëtar që mund të përballojë dhimbjen dhe të luajë edhe me probleme fizike.

Për shembull, në çerekfinalen e Euro 2024 kundër Anglisë, mesfushori luajti 120 minuta pavarësisht një dëmtimi muskulor.

Megjithatë, kjo nuk pritet të ndodhë në dy ndeshjet miqësore: të premten kundër Gjermanisë dhe të martën kundër Norvegjisë.

Ndërsa Yakin thotë se i duhet kapiteni dhe se Xhaka dëshiron të luajë në të dyja ndeshjet, ai nuk është i shqetësuar.

“Por do të diskutojmë sa gjatë do të luajë,” tha selektori.

Ndryshe nga kualifikimet për Kupën e Botës, ku Xhaka luajti 90 minuta në çdo ndeshje përveç asaj të fundit kundër Kosovës (1:1), koha e tij në fushë në këto miqësore mund të jetë më e shkurtër.

Në fund të fundit, trajneri dëshiron një Xhakë në formë maksimale për ndeshjen hapëse të Kupës së Botës kundër Katarit pas 81 ditësh.

Për këtë arsye, rekordmeni i paraqitjeve, si edhe disa bashkëlojtarë që luajtën të dielën me klubet e tyre, u lejua të mungojë në stërvitjen e parë të kombëtares të hënën në mbrëmje.