“Nëse harron nga vjen, humbet rrugën”/ Babai i Gatuzos flet për Italinë: Shkojmë në Botëror, tifozët e duan pasionin e Rinos

“Rino është pasion. I vërtetë, shumë i vërtetë, ka pasion për jetën dhe për futbollin. Dhe kjo mënyrë e të qenurit u hyn në mendje njerëzve.” Këto janë fjalët e Franko Gatuzos, babai i trajnerit të kombëtares italiane i cili foli për Gazzetta dello Sport.

Në prag të një ndeshjeje shumë të rëndësishme për futbollin italian që luhet të martën kundër Bosnjës, Franko komentoi edhe karakterin e djalit të tij, i cili ka lënë gjurmë në mendjet dhe zemrat e italianëve.

“Nuk mund të ishte ndryshe. A e keni parë duke qëndruar përpara stolit të ekipit kombëtar? Ai nxjerr dashuri për fanellën…” Por sa nga historia e tij personale është e përfshirë në të gjitha këto? Ka shumë. Ne kalabrezët jemi krijuar kështu, rrënjët tona na japin energjinë për të mos u dorëzuar kurrë. Rino është i lidhur me atdheun e tij, ai e di shumë mirë se nëse harron nga vjen, humbet rrugën.”

A do të shkojë Italia në Kupën e Botës? “Do të thoja po, do të shkojë. Italia e meriton, djali im e meriton. Ne të gjithë e meritojmë.”