Barcelona do të përfitojë afro 150.000 euro nga FIFA
- Bota Sot
Barcelona do të përfitojë afro 150.000 euro nga FIFA për shkak të dëmtimit të Rafinjës, i cili do ta mbajë atë jashtë fushave për pesë javë, si pasojë e një problemi muskulor në kofshën e djathtë të pësuar në ndeshjen miqësore midis Brazilit dhe Francës, të luajtur të enjten e kaluar në Boston.
FIFA është e detyruar të kompensojë Barçën, sepse sulmuesi brazilian do të qëndrojë jashtë fushave për më shumë se 28 ditë rresht, periudha minimale e përcaktuar në Programin e Mbrojtjes së Klubit.
Në terma sportivë, klubi katalanas do të pësojë një dëmtim shumë më të madh sesa shuma që do të marrë, pasi Rafinja është një lojtar i rëndësishëm për ekipin e Hansi Flik dhe do të jetë jashtë loje në një moment vendimtar të sezonit.
Sipas kohës së rikuperimit, braziliani pritet të humbasë pesë ndeshje të La Ligës dhe çerekfinalet e Ligës së Kampionëve.
