Çekia ndaj Danimarkës

Trajneri i Republikës Çeke, Miroslav Koubek, ka deklaruar se skuadra e tij duhet të tregojë nivel më të lartë loje nëse dëshiron të kualifikohet në Kupën e Botës, në përballjen vendimtare ndaj Danimarkës.

Ndeshja mes dy kombëtareve zhvillohet të martën në Pragë dhe do të përcaktojë një nga ekipet që do të sigurojë pjesëmarrjen në Kupën e Botës.

Trajneri shtatëdhjetë e katër vjeçar ka theksuar se përballja me danezët kërkon më shumë shpejtësi, qetësi dhe kreativitet në lojë.

“Shpresoj që të luajmë me më pak nervozizëm dhe të sjellim më shumë kreativitet në fushë. Duhet të përmirësohemi në disa aspekte të lojës”, është shprehur Koubek.

Ai e ka vlerësuar paraqitjen e lojtarëve në ndeshjen e kaluar, duke theksuar shpirtin luftarak si një faktor kyç në fitore.

“Dua t’i përgëzoj lojtarët për angazhimin dhe mentalitetin. Luftuan shumë dhe dhanë maksimumin. Megjithatë, gjithmonë ka hapësirë për përmirësim”, ka thënë ai.

Koubek ka shtuar se, përveç analizës së kundërshtarit, është e rëndësishme që skuadra e tij të imponojë stilin e vet të lojës.

“Duhet të kemi më shumë posedim dhe të luajmë më lirshëm. Është e rëndësishme të sjellim më shumë kreativitet në fushë, kjo mund të jetë çelësi i suksesit”, ka deklaruar ai.

Duke folur për kundërshtarin, trajneri çek ka vlerësuar cilësitë e Danimarkës, por ka lënë të kuptohet se edhe ata kanë dobësi.

“Danimarka ka lojtarë shumë cilësorë dhe është një ekip i organizuar mirë. E dinë saktësisht çfarë duan në fushë. Dobësi kanë, por nuk do t’i zbuloj”, ka thënë Koubek.

Sa i përket formacionit, ai nuk ka dhënë detaje konkrete, por e ka lënë të hapur mundësinë e ndryshimeve.

“Gjithmonë mendon për ndryshime në varësi të kundërshtarit, por nuk do të bëjmë rotacion të madh si në ndeshjet miqësore”, është shprehur trajneri çek.