Fundi i një epoke

Një kapitull i gjatë dhe i lavdishëm në historinë e Romës po shkon drejt fundit. Legjenda verdhekuqe, Bruno Conti, do të largohet nga klubi në fund të sezonit, pasi kontrata e tij skadon më 30 qershor dhe nuk pritet të rinovohet.

Pas më shumë se gjysmë shekulli në Trigoria, që nga viti 1973, Conti mbyll një rrugëtim të jashtëzakonshëm me klubin e zemrës.

Edhe pse mosha (71 vjeç) ka pasur ndikimin e saj, arsyeja kryesore lidhet me ndryshimet e thella që po ndodhin në strukturën e klubit, veçanërisht në sektorin e të rinjve.

Kohët e fundit, Conti ishte i angazhuar kryesisht me përzgjedhjen e talentëve të vegjël, deri te grupmosha U-14.

Por ristrukturimi i akademisë, me rikthimin e Massimo Tarantinos dhe përfshirjen e Pasquale Berardit në sektorin e skautingut, ka përshpejtuar një tranzicion që në praktikë e ka lënë gjithnjë e më shumë në hije figurën e tij. Në sfond qëndron edhe projekti i ri i klubit për krijimin e ekipit U-23, pjesë e vizionit të ri të pronarëve.

Sipas raportimeve, ndikimi i Contit në organizimin e ri është zvogëluar gradualisht.

Nuk bëhet fjalë për një ndarje të bujshme, por për një largim të qetë, si pasojë e një transformimi të klubit dhe të vetë futbollit të të rinjve. Conti pritet t’i përkushtohet familjes, pa plane për të vazhduar në një tjetër klub.

Trashëgimia e tij mbetet e jashtëzakonshme.

Si lojtar, ai fitoi titullin kampion në sezonin 1982-83 dhe pesë Kupa Italie, duke u kthyer në një simbol të përjetshëm të Romës.

Si drejtues i akademisë, kontribuoi në rritjen e talentëve si Daniele De Rossi, Lorenzo Pellegrini, Davide Frattesi dhe shumë të tjerë.

Largimi i tij nuk është vetëm fundi i një karriere, por edhe humbja e një pjese të identitetit të Romës, në një moment kur klubi po hyn në një epokë të re.