Lyon i largohet Evropës, Getafe afrohet

Skuadra e Olympique Lyon po kalon një formë të dobët, pasi ka barazuar pa gola 0-0 në udhëtim ndaj Angers në kuadër të Ligue 1.

Ky rezultat e çon Lyon në nëntë ndeshje radhazi pa fitore në të gjitha garat, duke humbur terren në renditje dhe duke rrezikuar seriozisht vendet që sigurojnë pjesëmarrjen në Champions League.

Skuadra franceze nuk ka arritur të fitojë që nga mesi i muajit shkurt dhe forma e dobët po reflektohet qartë në tabelë.

Në anën tjetër, në La Liga, Getafe ka marrë një fitore shumë të rëndësishme ndaj Athletic Club me rezultat 2-0, duke mbajtur gjallë shpresat për një vend në garat evropiane sezonin e ardhshëm.

Ndeshja është zhvilluar në stadiumin "Coliseum Alfonso Pérez", ku vendasit i dhanë fund pritjes shtatëvjeçare për një fitore në shtëpi ndaj skuadrës nga Bilbao.

Me këtë triumf, Getafe është vetëm katër pikë larg pesë skuadrave të para në tabelë, duke u afruar ndjeshëm me zonën evropiane dhe duke synuar rikthimin në kompeticionet ndërkombëtare për herë të parë që nga sezoni 2019/20.