Realit i duhet “Bellinghami i vërtetë” në pjesën finale të sezonit

Nata në “Bernabéu” ndaj Bayern Munichut ka lënë më shumë pikëpyetje sesa siguri te Real Madridi.

Mes sinjaleve që dolën në pah, një spikat mbi të gjitha: Jude Bellingham mbetet zemra që rreh e kësaj skuadre, edhe kur e nis nga bankina dhe nuk është në formën më të mirë.

Zgjedhja e Álvaro Arbeloas për të mos e aktivizuar titullar i ka habitur të gjithë, por e tregon një të vërtetë më të thellë: ish-lojtari i Borussia Dortmundit ka ende rrugë për të bërë për të arritur në 100%.

Nuk ka qenë i tillë prej muajsh: mesfushori anglez është përballur me probleme fizike dhe një rënie të pashmangshme, duke e paguar edhe ritmin e jashtëzakonshëm të sezonit të tij të parë në Madrid.

Megjithatë, hyrja e tij në fushë kundër Bayernit ndryshoi gjithçka.

Më shumë intensitet, më shumë cilësi, më shumë lidhje mes mesfushës dhe sulmit.

Brenda pak minutash vendosi rregull në kaos, duke treguar se sa shumë varet Reali nga prania e tij.

Nuk është rastësi që aksioni i golit lind pikërisht nga një lëvizje e tij, ndërsa fjalët e Arbeloas ishin të qarta:

“Nuk është ndëshkim, por menaxhim. Ka qenë i dëmtuar për një kohë të gjatë, duhet ta rikthejmë gradualisht në formën më të mirë.”

Me pak fjalë: Bellinghami i vërtetë ende duhet të rikthehet dhe është e rëndësishme që kjo të ndodhë sa më shpejt.

Momenti nuk mund të ishte më delikat. Ndeshja e kthimit në Gjermani do të jetë një betejë dhe, pa Aurélien Tchouaméni, pesha e mesfushës mund të bjerë edhe më shumë mbi supet e tij.

Por vështrimi shkon më tej: në horizont është edhe Botërori, ku Kombëtarja e Anglisë do të mbështetet pikërisht tek ai si lider i ekipit në fushën e blertë..