Zemërim te Barcelona, penalltia e mohuar ndez polemika

Barcelona mbeti e zemëruar të mërkurën mbrëma pas humbjes 2-0 ndaj Atletico Madrid në ndeshjen e parë çerekfinale të Ligës së Kampionëve në “Camp Nou”, por jo me veten, por me arbitrin.

Ndeshja mori kthesë pas përjashtimit të Pau Cubarsí, që u ndëshkua më pas nga Julian Alvarez me gol nga goditja e lirë, por katalanasit mendonin se të paktën u takonte një penallti në pjesën e dytë.

Incidenti në fjalë ndodhi kur portieri i Atletico-s, Juan Musso, vendosi topin brenda zonës së tij të vogël dhe më pas ia pasoi Marc Pubill. Mbrojtësi e ndali topin me dorë dhe ia ktheu sërish Musso-s, ndërsa loja vazhdoi pavarësisht protestave të lojtarëve të Barcelonës për prekje me dorë.

Musso e hodhi poshtë idenë e një penalltie si të pakuptimtë, ndërsa Marcus Rashford tha se nuk kishte debat për këtë rast. Hansi Flick reagoi ashpër ndaj vendimit, duke pyetur se cili është roli i VAR-it nëse jo për raste të tilla. Nga ana tjetër, Diego Simeone e quajti “logjikë të thjeshtë” mosdhënien e penalltisë.

Rregullat duket se janë në favor të Barcelonës. Siç theksojnë “Sport” dhe “MD”, Rregulli 16 i rregullores së IFAB parashikon:

Topi duhet të jetë i palëvizshëm dhe goditet nga çdo pikë brenda zonës së portës nga një lojtar i ekipit mbrojtës

Topi hyn në lojë kur goditet dhe lëviz qartë

Kundërshtarët duhet të jenë jashtë zonës së penalltisë derisa topi të jetë në lojë

Nëse, pasi topi hyn në lojë, lojtari që e godet e prek sërish para se ta prekë një lojtar tjetër, jepet goditje e lirë indirekte; nëse kryhet një shkelje me dorë: Jepet goditje e lirë direkte ,jepet penallti nëse shkelja ndodh brenda zonës së penalltisë së lojtarit që e ka prekur topin, përveç rastit kur ai është portier, ku jepet goditje e lirë indirekte

Ka pasur debat nëse Lamine Yamal kishte hyrë në zonë para se të ekzekutohej goditja nga porta, por kjo duket se ndodh vetëm pasi goditja konsiderohet e kryer nga Musso, sipas këndvështrimit të Barcelonës.

Sipas “Sport”, Barcelona po shqyrton mundësinë për të dërguar një ankesë zyrtare në UEFA, duke shprehur pakënaqësinë me arbitrimin.

Megjithatë, kjo pritet të mos ketë pasoja reale, pasi UEFA tashmë ka një vëzhgues arbitrazhi në çdo ndeshje, i cili harton raport për ngjarjet. Ata mund t’i përgjigjen klubit katalanas, por më shumë për korrektësi sesa për të marrë masa konkrete.

Siç thekson “Cadena SER”, ekzistojnë precedentë të ngjashëm. Në një ndeshje të kampionatit argjentinas mes Independiente dhe Colón, arbitri fillimisht nuk dha penallti për një incident të tillë, por pas rishikimit me VAR ndryshoi vendim.

E njëjta gjë ndodhi edhe në vitin 2024 në Ligën e Kampionëve mes Club Brugge dhe Aston Villa, kur skuadra belge fitoi penallti pasi Tyrone Mings e mori topin me dorë pas një pasimi nga Emiliano Martínez.

Nga ana tjetër, më vonë po atë vit, David Raya i pasoi topin Gabriel Magalhães brenda zonës së vogël gjatë një ndeshjeje mes Arsenal dhe Bayern Munich. Arbitri vendosi të lejojë përsëritjen e goditjes nga porta pasi Gabriel e mori topin me dorë dhe ia ktheu sërish Raya-s.