Flick i revoltuar

Trajneri i Barcelona, Hansi Flick, vazhdon të shprehë paqartësi se pse VAR-i nuk ndërhyri për të dhënë një penallti të mundshme ndaj Marc Pubill gjatë çerekfinales së Champions League kundër Atletico Madrid. Ai gjithashtu hodhi poshtë komentet e trajnerit të Real Madrid, Alvaro Arbeloa, lidhur me gjykimin në Spanjë.

Klubi katalanas ka paraqitur një ankesë në UEFA për arbitrimin në përballjen evropiane, duke mos e kuptuar vendimin e gjyqtarit Istvan Kovacs dhe mungesën e rishikimit nga VAR-i.

“Nuk e di se cili do të jetë rezultati, por për mua dhe ekipin është mirë që klubi na mbështet në këtë çështje, sepse ishte e padrejtë. Mund të bësh një gabim një herë, por jo dy herë, dhe mbështetja e klubit është një ndihmë e madhe,” tha Flick.

Në përgjithësi për VAR-in, Flick u shpreh pozitiv, por e cilësoi mungesën e ndërhyrjes si vendimtare në ndeshjen ndaj Atletico Madridit.

“Sigurisht, unë mendoj se VAR-i është futur për të ndihmuar.

Nëse ekipi i VAR-it pa diçka që nuk ishte në rregull, ata duhej ta thërrisnin gjyqtarin për ta rishikuar atë aksion, dhe kjo është ajo që mungoi në atë ndeshje. Mendoj se ka shumë gjëra që mund t’i bëjmë më mirë.

Është e vërtetë që nuk luajtëm ndeshjen tonë më të mirë dhe bëmë disa gabime, por ajo situatë nuk ishte e drejtë dhe në atë moment vendosi ndeshjen.”

Të enjten, trajneri i Real Madridit, Arbeloa, përmendi sërish çështjen “Negreira” duke folur për gjykimin në Spanjë, duke lënë të kuptohet për njëanshmëri kundër “Los Blancos”. Më herët, ai e kishte cilësuar këtë si skandalin më të madh në historinë e futbollit.

“Asgjë, asgjë. Nuk e harxhoj energjinë time. Është mendimi i tij, është në rregull. Unë fokusohem te skuadra ime, asgjë tjetër,” u përgjigj Flick.

“Nuk më interesojnë këto gjëra. Ky është ky biznes, ka shumë zhurmë mes nesh, por kjo është ajo që u them lojtarëve: duhet të fokusohemi te vetja dhe jo te ajo që bën Real Madridi. Jemi në një pozitë të mirë dhe duhet të fitojmë çdo ndeshje, duke menduar vetëm për veten.”

Barcelona do të përballet me Espanyol të shtunën në ora 18:30 në derbin katalanas në “Camp Nou”. “Blaugrana” aktualisht kryeson me shtatë pikë më shumë se Real Madrid, që luan ndaj Girona të premten në mbrëmje.