Ghisolfi me fjalë interesante për Granit Xhakën: E njoh

Florent Ghisolfi ka lavdëruar vendimin e Granit Xhakës për t’iu bashkuar Sunderlandit verën e kaluar si një moment kyç në sezonin e suksesshëm të klubit.

“Sunderland rikthehet në aksion në Premier League me mbijetesën pothuajse të siguruar, dhe roli i Xhakës brenda dhe jashtë fushës ka qenë jetik që klubi të tejkalojë shumicën e parashikimeve para sezonit.

Vendimi i Xhakës për të lënë ekipin e Bundesligës Bayer Leverkusen për një betejë të mundshme për mbijetesë habiti shumë njerëz, por Ghisolfi tha se mesfushorit iu deshën vetëm pesë minuta bisedë për të vendosur se donte ta pranonte këtë sfidë”, shkruan faqja “Sunderlandecho”. 

Drejtori i futbollit i Sunderlandit tha se, përveçse një lojtar në fushë, ardhja e Xhakës e përforcoi ndjeshëm pozitën e tij kur u propozonte lojtarëve të tjerë transferimin në ekip. 

“Unë mendoj se Graniti ishte një përforcim i madh për ne; pas kësaj ishte më e lehtë për mua të punoja në rekrutimin e lojtarëve, sepse u bëmë më tërheqës për ta.

Nuk mendoja se ekzistonte lojtari perfekt dhe tani e njoh Granitin.

Si lojtar dhe si lider ai është i jashtëzakonshëm.

Ai është gjithashtu shumë i përshtatshëm për klubin dhe komunitetin, sepse vlerat e tij janë shumë të afërta me vlerat e Sunderland.

Jemi shumë krenarë që ai i besoi klubit dhe komunitetit. Mendoj se ai i besoi projektit dhe për shumë njerëz ai tregoi se ky projekt ishte i besueshëm në Premier League”, tha ai.

Xhaka pritet të ketë një rol shumë të rëndësishëm në shtatë ndeshjet e fundit të sezonit të Premier League, pasi minutat e tij janë menaxhuar me kujdes gjatë pushimit të fundit ndërkombëtar, ndërsa ai vazhdon rikuperimin nga një dëmtim në kyçin e këmbës.