Leao drejt largimit nga Milani pas përplasjes me tifozët

Situata mes Milanit dhe Rafael Leaos duket se ka arritur në një pikë kritike, duke ngritur dyshime serioze për të ardhmen e portugezit në “San Siro”.

Ajo që nisi si një mesazh reflektimi nga ana e Leaos pas humbjes ndaj Udinezes është kthyer në një krizë të hapur.

Në ndeshjen e fundit, zëvendësimi i tij në minutën e 77-të u shoqërua me fishkëllima të forta nga tifozët, një sinjal i qartë i raportit të krisur me publikun kuqezi.

Sezoni aktual është ndër më të dobëtit për sulmuesin portugez, me vetëm 10 gola, shifra më e ulët që nga viti 2022.

Përveç problemeve fizike, si dëmtimi në aduktor dhe pubalgjia, forma e tij është ndikuar edhe nga pozicionimi në fushë.

Trajneri Massimiliano Allegri e ka përdorur shpesh si sulmues qendre në skemën 3-5-2, një rol që nuk i përshtatet cilësive të tij kryesore.

Tensionet nuk janë të reja. Në ndeshjen ndaj Lazios më 15 mars, Leao reagoi negativisht ndaj zëvendësimit, duke krijuar përplasje edhe me shokët e skuadrës si Christian Pulisic.

Vendimi i tij për t’u trajtuar në Portugali dhe mungesat në momente kyçe kanë shtuar pakënaqësinë në klub, i cili tashmë ka “ngrirë” bisedimet për rinovimin e kontratës deri në vitin 2030.

Në planin financiar, vlera e Leaos ka pësuar rënie të ndjeshme. Në vitin 2022, Milani refuzoi oferta rreth 100 milionë euro, ndërsa sot një ofertë mbi 50 milionë duket e vështirë.

Klube të mëdha si Barcelona, Paris Saint-Germain dhe Bayern Munich nuk e kanë më prioritet.

Ndërkohë, Milani po kalon një moment të vështirë në kampionat, me tri humbje në katër ndeshjet e fundit, duke rrezikuar seriozisht zonën Champions.

Allegri tashmë duhet të menaxhojë jo vetëm aspektin taktik, por edhe atë psikologjik në një skuadër që ka humbur balancën.

E ardhmja e Leaos mbetet në pikëpyetje: rikthim si protagonist apo largim nga “San Siro”?