Bellingham: Sonte gjithçka ose asgjë

Mesfushori i Real Madridit, Jude Bellingham, ka deklaruar se ndeshja e kthimit çerekfinale e Ligës së Kampionëve ndaj Bayern Munich do të përcaktojë fatin e sezonit për skuadrën madrilene. Ai theksoi se, pas rezultateve zhgënjyese në garat vendore, kjo përballje merr karakter vendimtar për klubin spanjoll.

“Duke marrë parasysh atë që ka ndodhur në ligë dhe kupa, është pothuajse një finale për ne”, ka thënë Bellingham, duke shtuar se skuadra dëshiron të vazhdojë të luftojë për diçka konkrete. “Ndjehet sikur gjithçka varet nga kjo ndeshje. Është një ndeshje gjithçka ose asgjë”, u shpreh ai.

Real Madridi ndodhet prapa në garën për titull në La Liga dhe ka mbetur pa sukses edhe në garat tjera, duke e bërë Ligën e Kampionëve objektivin kryesor. Në anën tjetër, Bayerni ka avantazhin 2-1 nga ndeshja e parë dhe i mjafton të shmangë humbjen për të siguruar kualifikimin në gjysmëfinale.

Mesfushori anglez foli edhe për sulmuesin e Bayern Munich, Harry Kane, duke e vlerësuar maksimalisht, por duke theksuar synimin për ta ndalur. “Ai është një lojtar sensacional... shpresojmë që ta ndalojmë të fitojë Ligën e Kampionëve nesër”, deklaroi Bellingham.

22-vjeçari pranoi se sezoni personal nuk ka qenë në nivelin e pritjeve, duke përmendur edhe vështirësitë në rikthimin nga lëndimi. “Ka qenë një sezon paksa zhgënjyes për mua… por tani ndihem mirë. Gjëja më e vështirë e rikthimit është mendore”, theksoi ai.

Bellingham hodhi poshtë edhe spekulimet për jetën e tij jashtë fushës, duke insistuar në profesionalizmin e tij. “Jam shumë profesional. Jam në fushën e stërvitjes çdo ditë duke u përpjekur të përmirësohem”, u shpreh ai.