Ekitike reagon pas dëmtimit të rëndë

Sulmuesi i Liverpoolit, Hugo Ekitike, ka reaguar me një mesazh emocional pas dëmtimit të rëndë që do ta mbajë jashtë fushave për një periudhë të gjatë dhe që i ka mbyllur derën pjesëmarrjes në FIFA World Cup.

23-vjeçari francez pësoi këputje të tendinës të Akilit gjatë ndeshjes së kthimit të çerekfinaleve të UEFA Champions League ndaj Paris Saint-Germain, duke u detyruar të largohej nga fusha i përlotur dhe i transportuar me barrelë pas vetëm 30 minutash loje.

Në një postim në Instagram, Ekitike ka shprehur dhimbjen e tij

: “Është e vështirë, ndoshta edhe e padrejtë…”, duke reflektuar për një sezon që për të ka përfunduar para kohe, si dhe për mungesën e sigurt në Botëror me kombëtaren e Francës.

“Jam mirënjohës që më ndodhi këtu, mes jush. Nuk jam vetëm.

Forca dhe dashuria juaj do të jenë burimi im i frymëzimit.

Shihemi së shpejti, Anfield,” ka shkruar sulmuesi, duke falënderuar tifozët e Liverpoolit.

Pamjet e tij pas ndeshjes kanë qenë veçanërisht prekëse, ku ai shfaqet i ulur i vetëm në fushë pranë logos së Champions League, një imazh që ka simbolizuar dhimbjen e eliminimit dhe dëmtimit njëkohësisht.

Sipas vlerësimeve mjekësore, rikuperimi nga një dëmtim i tillë pritet të zgjasë 8 deri në 10 muaj, duke e bërë këtë një nga momentet më të vështira të karrierës së tij të re.