Luftë e fortë për vendin shtesë në Champions

Gara për një vend shtesë në Champions League sezonin e ardhshëm është bërë më e ashpër se kurrë, me përballjen direkte mes La Ligës spanjolle dhe Bundesligës gjermane.

Rezultatet e çerekfinaleve të kompeticioneve evropiane kanë ndryshuar ndjeshëm balancat, duke afruar shumë Gjermaninë me Spanjën në renditjen sezonale të UEFA-s.

Prej kohësh, Premier League ka siguruar një nga vendet shtesë, ndërsa beteja për vendin e dytë dukej se do të fitohej nga spanjollët.

Megjithatë, eliminimet e njëpasnjëshme të skuadrave nga La Liga kanë ngushtuar diferencën, duke i dhënë shpresë Bundesligës për një përmbysje.

Aktualisht, Spanja mban një avantazh minimal prej vetëm 0,191 pikësh ndaj Gjermanisë, një diferencë që mund të zhduket në fazën gjysmëfinale.

Të dy kampionatet kanë nga dy skuadra në garë: Gjermania përfaqësohet nga Bayern Munich dhe Freiburg, ndërsa Spanja nga Atletico Madrid dhe Rayo Vallecano.

Performanca e këtyre ekipeve në ndeshjet e ardhshme do të jetë vendimtare për të përcaktuar se cili kampionat do të fitojë biletën e artë për një ekip të pestë në Champions.

Gjithçka mbetet e hapur dhe një detaj i vetëm mund të bëjë diferencën në këtë duel të zjarrtë mes dy prej ligave më të forta në Evropë.