Jeta e veçantë e ish-lojtarit të Realit

Rafael van der Vaart, ish-futbollist i Real Madrid, sot bën një jetë krejt ndryshe nga ajo që kishte gjatë karrierës së tij. Në moshën 43-vjeçare, holandezi duket i qetë dhe i lumtur, larg luksit dhe vëmendjes së tepërt.

I njohur si “Tulipani i Chiclana-s” për shkak të origjinës së familjes së tij nga Spanja, Van der Vaart nuk arriti të shfaqte plotësisht talentin e tij në LaLiga, as te Reali (2008–2010) dhe as te Betisi (2015–2016).

Sot ai është një komentator i njohur në televizionin holandez, merret me padel dhe madje ka marrë pjesë edhe në gara shigjetash.

Jeta e tij është shumë e thjeshtë: nuk ka makinë, nuk përdor email dhe një asistent e telefonon çdo ditë për t’i treguar agjendën. Këtë stil jetese e përshkruan gazetari Bart Vlietstra në librin kushtuar ish-mesfushorit.

Në periudhën te Reali, ai u përball me konkurrencën e fortë dhe me të ashtuquajturin “klani holandez”, ku bënin pjesë edhe lojtarë si Sneijder, Drenthe dhe Huntelaar. Shumë prej tyre u larguan në të njëjtën kohë, ndërsa ardhja e trajnerit José Mourinho dhe blerja e Mesut Özil-it ndikuan në largimin e tij drejt Tottenham Hotspur, ku ai shkëlqeu dhe fitoi zemrat e tifozëve.

Rikthimi në Spanjë me Betisin nuk shkoi sipas planit, pasi dëmtimet dhe humbja e fokusit ndikuan negativisht në formën e tij. Vetë Van der Vaart ka pranuar se ndryshoi stilin e jetesës dhe dietën, duke humbur disiplinën sportive.

Në jetën personale, ai ka lënë pas problemet e së kaluarës dhe tashmë është në një lidhje të qëndrueshme me Estavana Polman. Ndërkohë, ai vazhdon të jetë në qendër të vëmendjes për komentet e tij të drejtpërdrejta në media, shpeshherë polemizuese ndaj lojtarëve si Lamine Yamal apo Cristiano Ronaldo.

Ndërkohë, historia e familjes vazhdon në futboll. Djali i tij, Damián van der Vaart, 19 vjeç, është një talent në rritje tek Ajax-i dhe po ndjek hapat e të atit, duke ëndërruar një karrierë të madhe në futbollin evropian.