Milani dhe Juventusi ndezin ‘San Siron’

Një duel i madh pritet në Serie A, aty ku Milani dhe Juventusi do të përballen në ndeshjen e 182-të mes tyre, me vetëm tri pikë diferencë që i ndajnë në renditje.

Kjo sfidë mund të rezultojë vendimtare në garën për vendin e dytë, edhe pse titulli duket tashmë jashtë mundësive për të dyja skuadrat.

Milani vjen në këtë përballje pas një fitoreje minimale 1-0 ndaj Veronës, duke reaguar pas dy humbjeve radhazi pa shënuar. Skuadra e drejtuar nga Massimiliano Allegri ka bërë një sezon më të mirë se ai i kaluar, duke grumbulluar 15 pikë më shumë pas 33 javësh. Megjithatë, forma në shtëpi mbetet një pikëpyetje, pasi kuqezinjtë kanë humbur dy nga katër ndeshjet e fundit në “San Siro”, aq sa kishin humbur në 45 takimet pararendëse në kampionat.

Nga ana tjetër, Juventusi i drejtuar nga Luciano Spalletti po kalon një moment shumë pozitiv. Bardhezinjtë vijnë pas tri fitoresh radhazi pa pësuar gol, përfshirë suksesin 2-0 ndaj Bologna.

Mbrojtja është kthyer në armën kryesore, pasi Juventusi ka pësuar vetëm një gol në gjashtë ndeshjet e fundit në Serie A.

Një tjetër fitore pa pësuar gol do të ishte historike për ta, diçka që nuk e kanë arritur që nga viti 2023.

Historia e përballjeve direkte tregon për ndeshje shumë të forta dhe me pak gola. Tri nga katër takimet e fundit kanë përfunduar pa gola, ndërsa në pesë përballjet e fundit Juventusi nuk ka pësuar asnjë gol ndaj Milanit. Madje, në nëntë ndeshjet e fundit mes tyre në Serie A janë shënuar më pak se 2.5 gola.

Në aspektin individual, vëmendja do të jetë te Christian Pulišić për Milanin, i cili ka fituar të 12 ndeshjet ku ka shënuar, me shumicën e golave që vijnë në pjesën e dytë. Ndërkohë për Juventusin, Jonathan David është një tjetër lojtar kyç, pasi ka rezultuar vendimtar në ndeshjet ku ka gjetur rrugën e rrjetës.

Milani pritet të jetë me formacion të plotë, ndërsa te Juventusi mbeten në dyshim Emil Holm dhe Mattia Perin.

Me një histori të pasur dhe me shumë në lojë, kjo përballje pritet të jetë një tjetër kapitull i zjarrtë mes dy gjigantëve të futbollit italian.