Liverpooli po joshet me një shkëmbim të portierëve me gjigantin evropian

E ardhmja e Alisson Beckerit te Liverpooli mbetet e paqartë dhe një shkëmbim i mundshëm lojtarësh mund të ndikojë në largimin e tij nga “Anfield”.

Portieri brazilian ka qenë një nga lojtarët më të rëndësishëm të klubit që nga transferimi nga Roma në vitin 2018 për një shumë rekord në atë kohë për një portier.

Ai ka mbi 250 paraqitje me Liverpoolin, por sezonet e fundit është përballur me dëmtime të përsëritura, gjë që ka detyruar trajnerin Arne Slot të përdorë portierin rezervë Giorgi Mamardashvili.

Liverpooli tashmë i ka aktivizuar një zgjatje njëvjeçare të kontratës së Alissonit, por interesimi nga Juventusi dhe një rikthim i mundshëm në Itali vazhdojnë të qarkullojnë para merkatos së verës.

Raportet thonë se drejtuesit e Liverpoolit nuk janë plotësisht të bindur nga Mamardashvili si zëvendësim afatgjatë, pasi ai ka mbajtur vetëm tre porta të paprekura në 16 ndeshje këtë sezon.

Sipas “TEAMTalk”, Juventusi mund të përfshijë portierin e tyre Michele Di Gregorio në një marrëveshje shkëmbimi për të bindur Liverpoolin të lërë Alissonin të largohet.

Nuk është ende e qartë nëse Di Gregorio do të ishte portieri i parë apo do të konkurronte me Mamardashvilin për vendin titullar.

Ndërkohë, portieri i tretë Freddie Woodman ka bërë debutim të papritur në Premierligë kundër Crystal Palace, duke dhënë një paraqitje të mirë.

Liverpooli është lidhur gjithashtu me një lëvizje për portierin e Manchester Cityt, James Traffordin, i cili aktualisht është zëvendës pas rikthimit te City.

Trajneri Slot nuk e përjashtoi largimin e Alissonit, duke theksuar se çdo vendim merret në interes të klubit dhe me kujdes të plotë, veçanërisht duke marrë parasysh se disa lojtarë me përvojë si Mohamed Salahu dhe Andy Robertsoni gjithashtu pritet të largohen në fund të sezonit.

“Klubi i merr vendimet në mënyrën që mendon se është më e mira për të. Asgjë nuk bëhet pa qëllim dhe pa mendim. Në fund, Alisson ka ende një vit kontratë dhe vendimi do të varet nga shumë faktorë,” u shpreh Sloti.