Akreditohen tri programe të reja master në Universitetin e Prizrenit

Universiteti “Ukshin Hoti” Prizren njoftoi se ka shënuar një sukses të rëndësishëm akademik me akreditimin e tri programeve të reja të studimeve master, të miratuara nga Këshilli Shtetëror i Cilësisë në mbledhjen e tij të 149-të, të mbajtur më 18 maj 2026, përcjell Gazeta e Prizrenit.

Referuar njoftimit, Ky vendim paraqet një hap të rëndësishëm në avancimin e ofertës akademike dhe fuqizimin e kapaciteteve profesionale e shkencore të universitetit, duke krijuar mundësi të reja për studentët dhe zhvillimin e arsimit të lartë në vend.

Programet e akredituara janë:

Fakulteti i Edukimit – Edukim dhe Mësimdhënie në Matematikë në Gjuhën Turke, MA

Fakulteti Juridik – Legjislacion dhe Institucionet e Bashkimit Europian, LLM

Fakulteti i Shkencave të Jetës dhe Mjedisit – Shkencat Pyjore dhe Ekologji Pyjore, MSc

Këto programe janë aprovuar me kuota të përcaktuara studentësh dhe me vlefshmëri trevjeçare të akreditimit, duke dëshmuar përmbushjen e standardeve të cilësisë në mësimdhënie, kërkim shkencor dhe organizim akademik.

Rektori i universitetit e ka vlerësuar këtë arritje si një dëshmi të përkushtimit institucional për ngritjen e cilësisë në arsimin e lartë dhe zgjerimin e ofertës akademike në përputhje me nevojat e kohës.

“Akreditimi i këtyre programeve të reja master është një sukses i rëndësishëm për universitetin tonë dhe për gjithë komunitetin akademik. Kjo arritje reflekton punën dhe angazhimin e stafit akademik e administrativ në krijimin e programeve cilësore dhe konkurruese,” ka theksuar rektori Mentor Alishani. / Gazeta e Prizrenit