Avokati Koci thotë se është ndaluar edhe një qytetar i Kosovës në Serbi

Avokati Arianit Koci ka thënë se është ndaluar nga Serbia edhe një qytetar i Kosovës. Siç ka deklaruar në një postim në Facebook, qytetar në fjalë që vjen nga Gjakova fillimisht u ndalua gjatë kalimit të kufirit Serbi-Kroaci, ndërsa pas disa orësh është transferuar në Beograd.

Koci tutje ka thënë se ende nuk është e qartë baza juridike e ndalimit.

“Mbrëmë, gjatë kalimit të kufirit Serbi – Kroaci, është ndaluar nga autoritetet serbe Dugagjin Maxhuni, nga Beci i Gjakovës, i lindur më 10 maj 1979. Fillimisht është ndaluar për verifikim. Pas disa orësh, familja është njoftuar se ai është transferuar në Beograd dhe se procedurat ndaj tij po vazhdojnë. Për momentin ende nuk janë të qarta rrethanat dhe baza juridike e ndalimit. Jam duke i verifikuar informacionet dhe duke e përcjellë rastin”, ka shkruar Koci.

Tutje avokati sërish ka kritikuar situatën aktuale dhe institucionet e Kosovës për të cilat thotë se po merret me përplasje të pafundme përderisa “Serbia po vazhdon me arrestimin e qytetarëve tanë”.

Ministria e Punëve të Jashtme në vazhdimësi ka bërë thirrje ndaj qytetarëve të Kosovës, përfshirë edhe bashkatdhetarët që jetojnë në mërgatë dhe planifikojnë të udhëtojnë drejt Kosovës, që të përdorin rrugë alternative dhe të shmangin kalimin përmes Serbisë.

Kjo thirrje erdhi pas rasteve të përsëritura të ndalimeve dhe arrestimeve të qytetarëve të Republikës së Kosovës nga autoritetet serbe.

Lexo edhe:

Kush është arsimtari nga Dragashi, i arrestuar si i dyshuar për spiunazh?