Thaçi: Ushtria dhe policia serbe përfaqësonin aparatin e aparteidit dhe të spastrimit etnik kundër shqiptarëve

Ish-presidenti i Kosovës, Hashim Thaçi, në intervistën ekskluzive për emisionin “Top Story” nga Haga ka folur për shumë çështje, duke filluar nga krijimi i Gjykatës Speciale, akuzat e Dick Martyt, pastaj pjesëmarrjen e tij në luftë, e shumë çështje tjera.

Vetëm disa ditë para 16 shtatorit, kur Gjykata Speciale do të japë vendimin e saj, Thaçi argumenton se UÇK-ja është hetuar dhe gjykuar më shumë se çdo palë tjetër e konfliktit, ndërsa thekson se lufta në Kosovë ishte një përpjekje për vetëmbrojtje ndaj represionit dhe masakrave serbe.

I pyetur se prokuroria ka theksuar qëllimin për të marrë dhe ushtruar kontroll mbi Kosovën përmes krimeve ndaj kundërshtarëve të perceptuar dhe me çfarë e rrëzoni konkretisht në këtë tezë, Thaçi theksoi se Serbia për tetë dekada kishte instaluar, përmes dhunës dhe administratës, një pushtim klasik në Kosovë.