Gratë shqiptare evitojnë një tragjedi shumë më të madhe në Gjermani

Të premten një grua me origjinë gjermane ka sulmuar udhëtarët në autobusin për Siegen dhe ka plagosur gjashtë personat. Tragjedia ka mundur të jetë shumë më e madhe, por në autobus ishin edhe tri gra shqiptare...

Pas asaj që ka ndodhur në Solingen dhe asaj që po diskutohet për thikat dhe kriminelët me origjinë të huaj, duhet thënë shumë qartë se çfarë ka ndodhur në autobusin që po qarkullonte nga Neunkirhcen për Siegen, sepse gjërat nuk janë bardh e zi", deklaroi kryetari i bashkisë Siegen Steffen Meus para shumë njerëzve që ishin mbëdhur të shtunën në festën e këtij qyteti. Këto fjalë u shoqëruar me duartrokitje të mëdha, sepse ajo që ka ndodhur në këtë autobus është një tragjedi e paparë, e cila ka mundur të jetë edhe shumë më e rëndë.

Ditën e premte, me 31. gusht, në afërsi të qytetit Siegen, një grua me origjinë gjermane, sipas të gjitha gjasave me probleme psikike, ka sulmuar njerëzit në autobus me thikë dhe ka plagosur gjashtë persona. Dy prej tyre akoma janë në rrezik për jetën. Tragjedia, sipas fjalëve të kryebashkiakut Meus, ka mundur të jetë shumë më e madhe. "Por tri gra me sfond migrantësh e kanë ndalur sulmuesen dhe e kanë evituar një tragjedi shumë më të madhe", thotë kryebashkiaku.

Gratë shqiptare evitojnë një tragjedi edhe më të madhe

Deutsche Welle merr vesh se këto gra që kanë evituar një tragjedi shumë më të madhe në autobus janë me origjinë shqiptare. Ato janë A. P, A.B, dhe B, R-P (Redaksia e Deutsche Welles në shqip i ka edhe emrat e plotë të tyre dhe fotografitë, por për shkak të gjendjes së tyre dhe shokut që kanë përjetuar, për momentin nuk do ti publikojmë). Ne kemi biseduar me B. R-P, e cila shpjegon se çfarë ka ndodhur. Ato kanë qenë së bashku me katër fëmijë duke shkuar në festë në qytetin Siegen.

"Kemi qenë në autobus duke u knaqur, duke kaluar jashtëzakonisht mirë, duke qeshur e argëtuar me fëmijë... papritur është dëgjuar një piskamë. E kam parë që një grua po qëllonte të tjerët me thikë. Ka dashur të sulmojë edhe fëmijët tanë... A. P. ia ka kapur thikën me dorë dhe së bashku me A. B. e kanë kapur e kanë rrëzuar këtë grua. Unë kam kapur fëmijët dhe i kam nxerrë jashtë me shpejtësi... jam kthyer në autobus dhe ia kam marrë nga dora një çantë sulmueses... ia kemi nxjerrë thikën nga dora dhe e kemi shtrirë për toke. Njëra e mbante për duar, tjetra për këmbë... dikur ajo gruaja bërtiti "ich erbege mich" (dorëzohem)... u ul me një karrikë në augtobus dhe aty e kemi mbajtur deri sa nuk kanë ardhur policia... Autobusi ishte përplot me gjak në të gjitha anët,,, ishte tmerr", rrëfen në një bisedë me telefon B. R-P, e cila gjatë bisedës shpesh ndalonte dhe ofshante.

Vetëm pas daljes nga autobusi A.P. e ka vërejtur se në dorë kishte një plagë të madhe nga thika. Ajo dhe të lënduarit tjerë janë dërguar menjëherë në spital. A.P. është liruar ndërkohë nga spitali dhe tani është më mirë me shëndet. Por shoku i tyre është akoma i madh.

Trajtimi nga autoritetet

B. R-P. shpjegon se ato i kanë vizituar edhe autoritetet e qytetit. Kryetari i bashkisë i ka falënderuar ato për guximin e treguar dhe për faktin që me siguri kanë shpëtuar edhe shumë të tjerë, që kanë mundur të bien viktimë. Të premten gjatë natës janë trajtuar edhe nga psikologë, por për fat të mirë, ato kanë edhe familjet e tyre pranë vetes. Megjithatë frika dhe ankthi akoma janë të mëdha. "Sa herë i mbyll sytë, më paraqiten ato pamje të tmerrshme", thotë B. R-P.