Kjo është 35-vjeçarja nga komuna e Suharekës që vdiq në rrethana ende të paqarta

Një rast tragjik ndodhi sot paradite në fshatin Krushicë e Epërme të Suharekës, ku një 35-vjeçare ka vdekur  në rrethana dhe për motive ende të panjohura, raportoi Gazeta e Prizrenit.

Sipas Policisë Rajonale në Prizren, rasti ndodhi rreth orës 11:00, ku sipas deklaratave të familjes, gruaja ishte rrëzuar nga shkallët dhe kishte mbetur pa ndjenja.

Ndërkaq, Gazeta Sinjali raportoi se viktimë e këtij rasti ishte Drita Kabashi e cila dyshohet se ka bërë vetëvrasje.

Viktima është dërguar menjëherë në Spitalin Rajonal të Prizrenit dhe aty rreth orës 11:50, ka ndërruar jetë.

“Është bërë shikimi i vendit të ngjarjes dhe dyshohet se viktima ka rënë nga ballkoni i shtëpisë në lartësi rreth 6 metra. Policia është duke kryer hetimet për rastin, ndërsa në konsultim me Prokurorin është iniciuar rast”, konfirmoi për Gazetën e Prizrenit, Shaqir Bytyqi nga Policia e Prizrenit.

Me urdhër të Prokurorit, trupi i pajetë i të ndjerës është dërguar në Institutin e Mjekësisë Ligjore në Prishtinë për obduksion./Gazeta e Prizrenit.