85 milionëshi i United pritet të largohet nga “Djajtë e kuq” në janar

Antony është informuar  nga Manchester United se mund të largohet në afatin kalimtar të janarit, pas shkarkimit të Erik ten Hag, sipas një raporti të ri.

United shkarkoi Ten Hag këtë javë, me klubin që gjendet aktualisht në vendin e 14-të në Premier League.

Raportet sugjerojnë se Ruben Amorim është cak i klubit për zëvendësimin e holandezit, dhe sipas talkSPORT, Antony është informuar se mund të gjejë një klub të ri në janar, pasi ka arritur të shënojë vetëm pesë gola që nga ardhja në vitin 2022 për një shumë të madhe prej £85 milionë ($110 milionë).

United e di që nuk ka gjasa të rikuperojë shumën e investuar te Antony, por ish-klubi i tij Ajax dhe Fluminense kanë shprehur interes për nënshkrimin e tij. Antony ka kontratë të vlefshme deri në vitin 2027, por klubi mund të detyrohet të pranojë çdo ofertë që vjen për një lojtar që ka shënuar vetëm një gol në pesë paraqitje këtë sezon.

Antony asnjëherë nuk ka shënuar më shumë se nëntë gola në një sezon të vetëm të ligës, dhe sezoni i tij më produktiv te United ishte në 2022/23, kur shënoi katër gola. Te Ajax, sezoni i tij më i suksesshëm ishte 2020/21, kur shënoi nëntë gola dhe regjistroi tetë asistime.

United do të luajë kundër Leicester në EFL Cup para se të përballet me Chelsea në Premier League këtë fundjavë. Klubi ka bërë një lëvizje zyrtare për të emëruar trajnerin e Sporting CP, Ruben Amorim, si zëvendësues të Ten Hag, pasi ka komunikuar dëshirën për të paguar klauzolën e tij të lirimit prej 10 milionë euro (£8 milionë/$11 milionë).