Shefi i ushtrisë së Ukrainës: Po përballemi me një nga ofensivat më të fuqishme ruse

Shefi i ushtrisë së Ukrainës paralajmëroi se forcat e tij po përballen me “një nga ofensivat më të fuqishme ruse” që nga fillimi i luftës, pasi Rusia pretendoi se kishte kapur më shumë vendbanime në frontin lindor.

Rusia ka përparuar në rajonin lindor të Donbasit, të cilin presidenti rus Vladimir Putin synon ta pushtojë plotësisht. Reuters, duke cituar të dhëna nga disa burime, raportoi se Rusia ka përparuar me ritmin e saj më të shpejtë në të paktën një vit.

Komandanti i përgjithshëm i Ukrainës, Oleksandr Syrskyi tha se situata në vijën e frontit “mbetet e vështirë” dhe se disa zona “kërkojnë rinovim të vazhdueshëm të burimeve të njësive ukrainase”.

Ai tha se forcat e Kievit “po përmbajnë një nga ofensivat më të fuqishme ruse që nga fillimi i pushtimit në shkallë të gjerë”.

Gjatë fundjavës, Rusia pretendoi se kishte pushtuar dy vendbanime në rajonin e Donetsk: Kurakhivka dhe Vyshneve. Presidenti ukrainas, Volodymyr Zelensky tha se Rusia kreu më shumë se 50 sulme me dronë në Ukrainë gjatë natës të së dielës. Në javën e fundit, Rusia ka hedhur më shumë se 900 bomba në Ukrainë dhe ka lëshuar rreth 30 raketa dhe pothuajse 500 drone Shahed në disa rajone të Ukrainës, shtoi ai.

Zelensky ka kaluar javët e fundit duke u përpjekur të mbledhë mbështetje shtesë, por deri më tani nuk ka arritur të sigurojë pëlqimin për të goditur më thellë Rusinë.