Emigrantët/ Gjykata e Katanias kundër dekretit të vendeve të sigurta

Pas gjykatës së Romës, edhe ajo e Katanias nuk ka zbatuar dekretin e ri të qeverisë italiane për marrëveshjen e emigrantëve. Gjykata vendosi të mos miratojë ndalimin e një emigranti nga Egjipti, i cili kërkoi statusin e refugjatit në Pozzallo, me argumentin se ky vend nuk është i sigurtë.

Sipas gjykatës, lista e vendeve të sigurta e hartuar nga qeveria italiane, ku përfshihet edhe Egjipti, nuk e përjashton gjyqtarin nga detyrimi për të verifikuar përputhshmërinë me ligjin e Bashkimit Evropian dhe se në Egjipt ka shkelje të rënda të të drejtave të njeriut të cilat ndikojnë liritë e një rendi demokratik.

Dy javë më parë, për të zgjidhur ngërçin e krijuar nga gjykata e Romës, e cila nuk vleftësoi ndalimin e emigrantëve në qendrat e ndërtuara nga Italia në Gjadër, Këshilli i Ministrave miratoi listën me 19 vende të sigurta si ligj parësor. Duke qenë se Egjipti është pjesë e listës, qeveria italiane synonte që të mundësohej dëbimi i migrantit të refuzuar menjëherë, pa shqyrtuar kërkesën për mbrojtje.

Por sipas gjykatave italiane të thirrura për të vendosur deri tani, Egjipti nuk është, pasi për t’u konsideruar i tillë do të duhej të ishte i tillë për të gjitha kategoritë.

Ndalesa e dytë erdhi nga gjykata e Romës për kërkesën për azil të njërit prej 12 migrantëve, i cili u transferua në Shqipëri. Me këtë dispozitë, gjykata e Romës i referon Gjykatës Evropiane të Drejtësisë dekretin e ri për “vendet e sigurta”, duke kërkuar përgjigje urgjente dhe duke përmendur “ndërhyrjen e fundit të qeverisë italiane”.

Pak ditë më parë, gjykata e Bolonjës iu drejtua gjykatës së BE-së për të përcaktuar se cili është parametri “në bazë të të cilit duhet të identifikohen kushtet e sigurisë që janë në themel të përcaktimit të një vendi të tretë si vend i sigurt i origjinës”.