Ligjvënësit gjermanë nisin procesin për ndalimin e AfD-së

Një grup prej 113 ligjvënësish gjermanë nga fraksione të ndryshme kanë nënshkruar një kërkesë për të nisur procedurat për ndalimin e partisë së ekstremit të djathtë Alternativa për Gjermaninë (AfD), njoftoi transmetuesi publik ZDF sot.

Marco Wanderwitz, një ligjvënës konservator nga CDU i qendrës së djathtë, tha se aplikimi i tyre i është dorëzuar presidentit të Bundestagut Barbel Bas. Ai theksoi urgjencën e çështjes, duke përmendur zgjedhjet e reja të ardhshme si një faktor kritik në kohën e këtij veprimi.

Objektivi parësor është të dorëzohet dhe të votohet aplikimi gjatë periudhës aktuale legjislative, duke mundësuar që Gjykata Kushtetuese Federale të nisë procedurat, sipas ligjvënësit.

Megjithatë, mbetet e paqartë nëse apo kur aplikimi do të trajtohet zyrtarisht në agjendën parlamentare.

Sipas Kushtetutës gjermane, Bundestagu, Këshilli Federal (Bundesrat) dhe qeveria mund të aplikojnë në Gjykatën Kushtetuese Federale për të ndaluar një parti për qëllimet e saj antikushtetuese ose sjelljen antidemokratike.

Në të kaluarën, disa përpjekje për të ndaluar partitë e ekstremit të djathtë kishin dështuar për shkak të polemikave ligjore, mungesës së provave objektive ose gabimeve të bëra në përgatitjen e rastit.

Gjykata Kushtetuese Federale hodhi poshtë një kërkesë për të ndaluar partinë e ekstremit të djathtë NPD në 2003 me arsyetimin se disa nga zyrtarët e partisë të përdorur si dëshmitarë ishin informatorë të agjencisë vendase të inteligjencës.

Një përpjekje e dytë për të nxjerrë jashtë ligjit NPD dështoi gjithashtu në vitin 2017, pasi gjyqtarët federalë arritën në përfundimin se partia nuk kishte potencial për të realizuar aktivitetet e saj antikushtetuese ose antidemokratike.

AfD ka rritur ndjeshëm përqindjen e votave në vitet e fundit duke bërë fushatë kundër migracionit, duke nxitur frikën e myslimanëve dhe emigrantëve. Partia ka përfituar gjithashtu nga pakënaqësia e përhapur me kancelarin Olaf Scholz dhe qeverinë e tij të koalicionit, dhe frika e një rënieje ekonomike.

Një sondazh i publikuar nga Instituti Forsa të martën zbuloi se 17% e gjermanëve planifikojnë të votojnë për AfD, duke e bërë atë partinë e dytë më të fortë pas bllokut konservator CDU/CSU (33%).

Sondazhi i fundit tregoi se SPD e Scholzt me 16%, ndërsa partneri i saj i koalicionit, të Gjelbërit ishte 11%. Demokratët e Lirë Liberalë (FDP), të cilët u larguan nga qeveria e koalicionit javën e kaluar, u votuan me 4%, duke mos arritur pragun prej 5% të kërkuar për të hyrë në parlament.