Kjo është gruaja serbe që u fut në telashe pasi incizoi jashtëligjshëm Policinë e Kosovës në Bistricë

Fotografimi i paautorizuar i postbllokut të Policisë së Kosovës pranë urës së Bistricës, i ka kushtuar me ndalim një gruaje, shtetase serbe, të dielën në Zveçan. E dyshuara nuk ka përfillur as urdhrat e Policisë dhe për pasojë përfundoi në stacion policor.

Media ka mësuar se gruaja që u shoqërua në stacion pasi u fut në telashe me Policinë është Jovana Radosavljevic.

E dyshuara ka bërë video incizim të postbllokut të Policisë përkundër faktit se ka shenja të qarta se filmimi është i ndaluar në këtë zonë.

Pasi njësia policore e ka ndaluar, të dyshuarës i është tërhequr vërejtja, por e njëjta ka shpërfillur urdhrat zyrtarë dhe më pas është shoqëruar në stacion policor.

Lidhur me rastin, është vënë në dijeni edhe Prokurori i Shtetit dhe janë ndërmarrë veprimet e nevojshme.