Qeveria franceze përballet me mocionin e mosbesimit, Barnier: Situatë e brishtë, gjithçka do varet nga deputetët

Kryeministri francez Michel Barnier shpreson që Qeveria e tij të mos rrëzohet nga mocioni i mosbesimit që është paraqitur nga koalicioni i majtë dhe e djathta ekstreme në Asamblenë Kombëtare, votim që do të kryhet të mërkurën.

I intervistuar në TF1 dhe France 2, kryeministri Barnier tha se e konsideronte “të mundshme” që qeveria e tij të mos rrëzohej nesër. “Kjo varet nga deputetët, secili prej të cilëve ka një pjesë të përgjegjësisë para popullit francez,” tha ai, sipas Le Monde.

Megjithëse e konsideron situatën si të komplikuar, sepse nuk ka shumicë, Barnier shprehet “e di që është një situatë e brishtë dhe kalimtare”.

Ai tha se “mocioni nuk është një votë pro ose kundër Barnier, është një votim mbi një tekst” – në këtë rast projektligji i financimit të Sigurimeve Shoqërore.

Francezët “ndjejnë se nuk duhet të ketë kaos”, tha ai, sipas Le Monde.

Barnier ka thënë se ai mendon se teksti i projektligjit mund të përmirësohet. “Unë gjithmonë kam thënë se ky tekst mund të përmirësohet, se nuk ishte përfundimtar dhe se ne e kemi përmirësuar atë”, shtoi ai.

“Ne i dëgjuam të gjithë dhe kemi bërë përparim në shumë pika. Vetëm dje në mëngjes, për heqjen e medikamenteve, sqarova se nuk do të kishte asnjë çregjistrim”, tha Barnier.

Kryeministri francez ka mbrojtur buxhetin e tij për vitin 2025, duke thënë se ai ka qenë objekt i punës “për javë dhe javë”. “Nuk e kam kënaqësi të paraqes një buxhet kaq të vështirë,” tha ai.

Nëse votimi kryhet, do të jetë hera e parë që një Qeveri franceze rrëzohet me një mocion mosbesimi që nga viti 1962.

Dy mocione të veçanta mosbesimi janë paraqitur, nga opozita e majtë dhe e djathtë. Ai nga e djathta ekstreme nuk ka gjasa të kalojë, por ai i propozuar nga e majta do të kalojë me mbështetjen e ligjvënësve të Tubimit Kombëtar (RN) të ekstremit të djathtë të Marine Le Pen.

Kriza shpërtheu kur Barnier tha se do të kalonte komponentin e sigurimeve shoqërore të buxhetit të tij 2025 pa votim parlamentar.

Masa kushtetuese që i lejon atij ta bëjë këtë njihet si neni 49.3. Ai u jep deputetëve mundësinë të kundërshtojnë lëvizjen e qeverisë përmes një mocioni mosbesimi, i cili duhet të votohet brenda 48 orëve.

Nëse mocioni kalon, Barnier dhe qeveria e tij rrëzohen.