Vajza krenare nga Hasi, që udhëheq transformimin e sigurisë kombëtare të mbrojtjes së Kosovës

Me prejardhje nga Kabashi i Hasit, nëpërmjet babait e gjyshit të saj, Besa Kabashi-Ramaj është një eksperte e arrirë në fushën e sigurisë dhe mbrojtjes kombëtare, menaxhimit strategjik dhe inteligjencës kulturore.

Me mbi një dekadë përvojë, ajo ka mbajtur role të larta dhe ekzekutive në qeverinë e Republikës së Kosovës, organizatat ndërkombëtare e institucione private. Ekspertiza e saj përfshin sigurinë kombëtare, politikat publike, sektorin e sigurisë dhe reformën e mbrojtjes, zhvillimin organizativ, sigurinë ndërkombëtare dhe angazhimin ndërkombëtar. Ajo tashmë i ka hy garës për deputete në listën e PDK-së dhe mban numrin 27.

Besa ka një Master për Çështjet Publike dhe Ndërkombëtare në Studimet e Sigurisë dhe Inteligjencës nga Universiteti i Pittsburgh dhe një BA në Shkenca Politike nga Universiteti Ouachita.  Ajo i rriti më tej aftësitë e saj përmes Programit të Edukimit Ekzekutiv në Shkollën Kennedy të Harvardit dhe si studiuese e Qendrës Evropiane për Studime të Sigurisë George C. Marshall. Nga viti 2022, Besa ka shërbyer si Udhëheqëse e Departamentit për Siguri Kombëtare dhe Mbrojtje brenda Kabinetit për Qeverisje të Mirë, në Partinë Demokratike të Kosovës ku edhe është anëtare e Kryesisë së partisë që nga viti 2021.

Ajo është gjithashtu themeluese dhe CEO e BKR & Associates, një kompani e specializuar në këshillimin strategjik, këshillimin e menaxhimit, këshillimin e ekzekutivit dhe sigurinë kombëtare. Mes shumë roleve të saj të dukshme, Besa shërbeu si Këshilltare për Sigurinë Kombëtare e Kryeministrit të Kosovës, ku udhëhoqi hartimin e strategjisë së sigurisë kombëtare, menaxhoi portofolin e sigurisë kombëtare dhe koordinoi hartimin e kapaciteteve të para të përbashkëta ajrore kombëtare të Kosovës për emergjenca civile.

Gjithashtu Besa ishte edhe Koordinatore Kombëtare për Parandalimin dhe Kundërshtimin e Ekstremizmit të Dhunshëm dhe anëtare e Këshillit të Sigurisë Kombëtare. Kontributet e saj përfshijnë shërbimin si Koordinatore e Rishikimit të Sektorit Strategjik të Sigurisë për Kosovën, mbikëqyrjen e rishikimit të parë gjithëpërfshirës të sigurisë në vend që transformoi FSK-në në ushtri, dhe duke vepruar si Këshilltare e Lartë për Politikat e Sigurisë dhe Çështjeve Ndërkombëtare të Ministrit për Forcën e Sigurisë së Kosovës.

Përveç arritjeve të saj profesionale, Besa është një folëse e respektuar publike, studiuese dhe autore e temave të sigurisë kombëtare, mbrojtjes dhe sigurisë njerëzore, me disa botime në emër të saj. Besa flet gjashtë gjuhë, balancon karrierën e saj me pasionin për pikturën dhe kinematografinë dhe e çmon kohën me dy djemtë e saj. / Gazeta e Prizrenit