Chiesa pranë rikthimit në Serie A

Raportet nga Franca këtë mbrëmje pretendojnë se Napoli është pranë arritjes së një marrëveshjeje për huazimin gjashtëmujor të Federico Chiesa nga Liverpool.

Sipas Footmercato, dy klubet po diskutojnë situatën me agjentin e Chiesa-s, Fali Ramadani, ndërsa faktori kryesor që po e shtyn këtë marrëveshje është prania e trajnerit Antonio Conte.

Ish-trajneri i Italisë beson se mund të nxjerrë më të mirën nga Chiesa dhe të ringjallë karrierën e tij edhe për kombëtaren e Italisë, Azzurri.

Anësori u transferua në Anfield Road nga Juventusi në gusht për 12 milionë euro, plus 3 milionë euro në formë bonusesh të bazuara në performancë.

Megjithatë, problemet e tij fizike që e kanë ndjekur gjatë karrierës te Juve kanë vazhduar edhe në Premier League, ku ai ka luajtur vetëm katër ndeshje për Liverpool-in në të gjitha kompeticionet, për gjithsej 123 minuta lojë.

Me një pagë prej 7.5 milionë eurosh në sezon neto, Napoli do të ketë nevojë për ndihmën e Liverpool-it për të mbuluar të paktën gjysmën e kësaj pagese gjatë periudhës së huazimit.

Footmercato raporton gjithashtu se Liverpool mund të jetë i hapur për të përfshirë një opsion për ta bërë lëvizjen të përhershme për më shumë se 13 milionë euro.