“Çmimi më i lartë për luftën”: Rusia humbi 430,000 ushtarë vetëm në vitin 2024, thotë Ukraina

Përparimi gradual dhe i vështirë i Rusisë në pjesë të rajonit lindor të Ukrainës, Donetsk, ka arritur të bëjë shkatërrime jo të vogla.

Ky ishte vlerësimi i Institutit për Studimin e Luftës, një institut me bazë në Uashington, bazuar në imazhet satelitore dhe pamjet video të gjeolokuara.

“Forcat ruse kanë kapur katër vendbanime të përmasave mesatare – Avdiivka, Selydove, Vuhledar dhe Kurakhove – gjatë gjithë vitit 2024, më i madhi prej të cilëve kishte një popullsi të paraluftës prej pak më shumë se 31,000 njerëz”, ka thënë ISW.

Forcat ruse kaluan katër muaj duke marrë Avdiivka dhe dy muaj secila për Selydove dhe Kurakhove.

Me këtë ritëm, Rusisë do t’i duheshin edhe dy vjet të tjera për të përfunduar pushtimin e saj të Donetsk-ut vetëm, vlerësoi ISW – diçka që presidenti rus Vladimir Putin kishte urdhëruar komandantët e tij të bënin deri më 1 tetor.

Por sakrificat e Rusisë për të arritur këto përparime kanë qenë të jashtëzakonshme, pasi forcat ukrainase përdorën avantazhin e mbrojtësit të tyre për të shkaktuar viktima të mëdha, veçanërisht në mjediset urbane ku ata luftuan ndërtesë më ndërtesë, rrugë më rrugë.

Në këtë drejtim, komandanti i Përgjithshëm ukrainas Oleksandr Syrskii ka thënë së fundmi se forcat ruse kishin pësuar rreth 427,000 të plagosur dhe vrarë në vitin 2024.

Disa ditë më vonë, Ministria e Mbrojtjes e Ukrainës vlerësoi humbjet e Rusisë vitin e kaluar në 430,790 ushtarë – duke i tejkaluar humbjet e saj në vitin 2022 dhe 2023 të kombinuara.

Këto humbje arritën në një mesatare prej 1,180 në ditë, por shifrat e viktimave u rritën ndjeshëm në fund të vitit, pasi forcat ruse i shtuan sulmet e tyre në një përpjekje të dukshme për të ndikuar në zgjedhjet në SHBA.

Humbjet më të larta mujore, tha Ministria e Mbrojtjes, erdhën në nëntor dhe dhjetor – përkatësisht 45,720 dhe 48,670 – ndërsa Rusia intensifikoi sulmet e saj në Donetsk.

“Këtë vit, rusët paguan çmimin më të lartë për luftën kundër Ukrainës, pasi ushtria jonë dhe të gjitha forcat tona të mbrojtjes dhe sigurisë të Ukrainës shkatërruan më shumë pajisje armike dhe fuqi njerëzore se në cilindo nga vitet e mëparshme të luftës”, citohet të ketë thënë Syrksyi, gjatë një adresimi më 31 dhjetor.