Milan i interesuar për huazimin e Rashford nga Manchester United

Milan po shqyrton mundësinë për të siguruar shërbimet e Marcus Rashford nga Manchester United në formë huazimi gjatë këtij muaji.

Sipas burimeve të "Sky Italy", klubi italian po zhvillon diskutime të brendshme për transferimin e mundshëm të sulmuesit anglez.

Rashford, i cili ka shprehur dëshirën për një sfidë të re, pritet të largohet nga Manchester United gjatë merkatos së janarit.

Trajneri i ri i Milanit, Sergio Conceicao, është i vendosur të përforcojë repartin ofensiv, veçanërisht pas lëndimit të Rafael Leaos. Rashford mund t’i bashkohet grupit të lojtarëve anglezë në "San Siro", ku tashmë luajnë Fikayo Tomori, Ruben Loftus-Cheek dhe Tammy Abraham.

Milani synon të realizojë një marrëveshje huazimi, ndërsa pritet që Manchester United të mbulojë një pjesë të pagës së lojtarit.

Manchester United është në proces të riorganizimit të skuadrës, me disa lojtarë që mund të largohen për të siguruar fonde. Ndër kandidatët për largim janë Christian Eriksen, Victor Lindelof dhe Jonny Evans, të cilëve u skadon kontrata në verë. Po ashtu, Casemiro dhe Antony mund të largohen nëse mbërrijnë oferta të përshtatshme.

Milani aktualisht renditet në vendin e tetë në Serie A, tetë pikë larg zonës së Champions League, pas një fillimi jo të mirë të sezonit.