Zelensky: Një marrëveshje paqeje Ukrainë-Rusi do të kërkonte 200 mijë trupa aleate

Presidenti ukrainas, Volodymyr Zelensky thotë se të paktën 200 mijë trupa të partnerëve aleatë do të nevojiteshin për të zbatuar çdo marrëveshje paqeje në Ukrainë.

Duke folur në Forumin Ekonomik Botëror në Davos, Zelensky tha se liderët evropianë nuk duhet të pyesin veten se çfarë do të bënte më pas Trump, dhe tha se në vend të kësaj ata duhet të ndërmarrin hapa kolektivë për të mbrojtur kontinentin e tyre në një kohë kur ai ishte nën sulm agresiv nga Rusia.

“Evropa duhet të vendoset si një lojtar i fortë, global, si një lojtar i domosdoshëm,” tha presidenti ukrainas. Ai përmendi përfshirjen e trupave të Koresë së Veriut në luftën e Moskës kundër Kievit, ku luftimet po zhvillohen në rajonin Kursk të Rusisë perëndimore, afër kufirit lindor të Ukrainës.

“Të mos harrojmë se nuk ka asnjë oqean që ndan vendet evropiane nga Rusia. Udhëheqësit evropianë duhet të kujtojnë se këto beteja ku përfshihen ushtarë të Koresë së Veriut po ndodhin tani në vende gjeografikisht më afër Davosit sesa Phenianit”, tha ai.

Ai dha gjithashtu detaje se si mund të funksiononte një operacion paqeruajtës ndërkombëtar, nëse mund të arrihej një marrëveshje midis Ukrainës dhe Rusisë, duke i thënë se do të duhej një grup i madh.

“Nga të gjithë evropianët? 200,000, është një minimum. Është një minimum, përndryshe nuk është asgjë”, tha ai.