Danilo largohet nga Juventus

Mbrojtësi brazilian Danilo është larguar nga Juventus pas pesë viteve e gjysmë. Lajmi është konfirmuar të hënën nga klubi italian i Serie A.

Danilo, i cili i ishte bashkuar Juventus në vitin 2019, ka zhvilluar 213 ndeshje për klubin italian, duke shënuar nëntë gola. Braziliani vendosi të largohej përpara përfundimit të kontratës së tij, që ishte e vlefshme deri në qershor.

Ndeshjen e fundit me fanellën bardhezi ai e ka luajtur në dhjetor të vitit të kaluar, kundër Venezia në Serie A.

"Të dashur tifozë, nuk e di nga t’ia filloj. E dija që ky moment do të vinte herët a vonë, por asnjëherë njeriu nuk është gati për lamtumira. Pesë vite e gjysmë kanë kaluar, por për mua duket si një jetë e tërë", ka shkruar Danilo. 

Gjatë kohës së tij në Torino, ai ka qenë pjesë e skuadrës që fitoi një "Scudetto", një Superkupë të Italisë dhe dy Kupa të Italisë. Gjitashtu ai kishte përfaqësuar Brazilin në Kupat e Botës 2018 dhe 2022.