Lewandowski tregon nëse do të largohet nga Barcelona

Robert Lewandowski po përjeton sezonin e tij më të mirë te Barcelona, duke shënuar 29 gola në 30 ndeshje. Kohët e fundit është përfolur për një largim të polakut gjatë verës së ardhshme nga Barcelona dhe është përmendur Arabia Saudite si destinacioni i ri mundshëm.

37-vjeçari i ka mohuar këto zëra dhe iu është kundërpërgjigjur më së miri atyre që e konsiderojnë si “të moshuar” për Barcelonën, duke thënë se është krenar për moshën e tij dhe nuk e ka problem për aq kohë sa është në formë fizike të mirë.

“Ndihem shumë mirë te Barcelona, jo vetëm në klub, por edhe mes tifozëve.

E ndjej çdo ditë këtë gjë, në stadium, në rrugë, me shokët e ekipit. Jam shumë i lumtur këtu.

Unë nuk mendoj për asgjë më shumë dhe ndoshta asgjë nuk do të ndodhë në këtë çështje (në lidhje me zërat për largimin në verë). Nuk më vjen turp dhe nuk shoh asnjë problem pse jam 37 vjeç.

Nga pikëpamja fizike nuk kam frikë, përderisa zemra ime më thotë se ia vlen, do ta bëj”, tha Lewandowski për Mundo Deportivo.