Ursula von der Leyen dënon vandalizmin e ndërtesës së KE në Sofje

Presidentja e Komisionit Evropian Ursula von der Leyen ka dënuar ashpër vandalizmin në ndërtesën e përfaqësisë së KE në Sofje, që ndodhi pas protestës së sotme kundër adoptimit të euros.

“Skena të egra në Sofje ku u vandalizua zyra jonë e BE. Në Evropë, ne ushtrojmë të drejtën tonë për të demonstruar në mënyrë paqësore. Dhuna dhe vandalizmi nuk janë kurrë zgjidhja”, tha ajo në platformën X.

Protesta e sotme e organizuar nga partia “Preporod” është përshkallëzuar pasi demonstruesit hodhën bojë të kuqe, bomba dhe vezë në fasadën e objektit të KE-së, ndërsa në vendngjarje janë dërguar me urgjencë ekipe të zjarrfikësve, xhandarmërisë dhe ambulancës.

Derës së përparme iu vu zjarri dhe policia ndërhyri për të penguar hyrjen në ndërtesë, duke përdorur forcën për të shpërndarë protestuesit.

Si pasojë e përplasjes dy deputetë të partisë “Preporod” janë lënduar të cilët janë dërguar në spital, ndërsa një deputet është arrestuar, njofton portali bullgar News.

Përfaqësuesit e partisë deklaruan se kundër demonstruesve është përdorur “forca e tepruar” dhe se veprimet e tyre janë “të krahasueshme me demonstratat në vendet e tjera evropiane”.

Bashkëthemeluesi i “Rilindjes” dhe deputeti i parlamentit bullgar, Tsonço Ganev, ka kërkuar dorëheqjen e qeverisë së kryeministrit Bojko Borisov dhe ka deklaruar se partia do të bëjë gjithçka që nga e mërkura të bllokojë punën e parlamentit.