Rummenigge: Të kënaqurit e agjentëve dhe lojtarëve nuk është e ardhmja

Çështja e tavanit të pagave është gjithnjë e më shumë në qendër të diskutimeve në botën e futbollit. Karl-Heinz Rummenigge, ish-CEO i Bayernit, e ka trajtuar këtë temë me presidentin e FIFA-s, Gianni Infantino, të cilin e ka takuar gjatë festimeve për 125-vjetorin e klubit bavarez. Rummenigge ka sqaruar edhe një herë pozicionin e tij:

"Kam biseduar me Infantino për të parë nëse ka mundësi që FIFA të ndërhyjë. Mendoj se na nevojitet FIFA për të gjetur një zgjidhje për këtë çështje, por unë jam mbështetës i idesë që të jenë të pranishëm të gjithë aktorët e përfshirë, përfshirë sindikatat e lojtarëve. Na duhen konsulentët, na duhen ligat dhe gjithashtu federatat për ta arritur këtë qëllim.

Pa dyshim, është një diskutim i vështirë, por ne duhet ende të mundohemi të gjejmë zgjidhje, sepse gjërat nuk mund të vazhdojnë kështu.

Mendoj se të gjithë drejtuesit që punojnë në futboll, kudo në botë, janë në kërkim të parave çdo ditë, thjesht për t’i bërë lojtarët dhe agjentët të lumtur. Sidoqoftë, kjo nuk mund të jetë e ardhmja e futbollit".